Pretendimet e Donald Trump për mashtrime elektorale “në shkallë të gjerë” kanë nxitur zyrtarët në të gjithë spektrin politik në Shtetet e Bashkuara të paralajmërojnë për rrezikun e monitoruesve të armatosur, ndërkohë që po shtohet frika e një përballjeje, e madje, e përdorimit të dhunës në ditën e zgjedhjeve.
Ndërsa sondazhet tregojnë një ngushtim drastik të diferencës mes Trump dhe Clinton në prag të zgjedhjeve presidenciale, ka shqetësime për kaos në ditën e zgjedhjeve, bazuar në pretendimet e kandidatit republikan, që as nuk bazohen në prova serioze, se zgjedhjet mund të manipulohen edhe refuzimit të tij për të deklaruar nëse do të pranojë rezultatin.
Partia Demokratike ka ndërmarrë një sërë padish ligjore në të gjithë vendin ku pretendon për kërcënim të votuesve, ndërkohë që në shtetin e betejës së fortë elektorale, në Ohajo, një gjykatës lëshoi një urdhër të përkohshëm kufizimi kundër fushatës së Trump dhe një prej këshilltarëve të tij, Roger Stone. Vendimi i gjykatës thoshte se secili që do të përfshihet në intimidim apo kërcënim të votuesve pranë apo brenda qendrave të votimit do të përballej me akuza gjyqësore.
Liderët republikanë në disa shtete kyçe raportojnë për një rritje të vullnetarëve që regjistrohen për të shërbyer si vëzhgues zyrtarë në qendrat e votimit e në një lëvizje të paprecedent, vetë fushata Trump ka që prej muajit gusht që u bën thirrje vullnetarëve të regjistrohen si “vëzhgues zgjedhorë” në atë që tashmë cilësohen përpjekja: “Më ndihmo të ndaloj Hillarinë mashtruese nga deformimi i këtyre zgjedhjeve”. Këshilltari Stonë, ndërkohë, ka thënë se kishte ndihmuar në rekrutimin e njerëzve për të menaxhuar exit poll-et që të mund të shmangte kërcënimin e votuesve.
Edhe milicia me më shumë ndikim në SHBA, një lëvizje antiqeveritare dhe një grup neonazist kanë njoftuar planet e tyre për të dërguar anëtarë të vet në monitorimin e mashtrimeve elektorale jashtë qendrave të votimit.
Ish- kryeprokurori i përgjithshëm amerikan, Alberto Gonzales, republikan që ka shërbyer në administratën e Xhorxh Bushit, ka marrë një linjë të ashpër kundër dyshimeve për mashtrime elektorale. Ai u shpreh për “The Guardian”: “Nuk do të isha një mbështetës i madh i këtyre lloj përpjekjesh private. Sinqerisht do të doja të varej nga shteti dhe zyrtarët lokalë përpjekja për të siguruar integritetin e votës”.
Në SHBA, por rritet druajtja edhe e paraqitjes së individëve me armë brenda qendrave të vitimit me qëllim kërcënimin e votuesve në shtete të tilla që lejojnë mbajtjen hapur të armëve. Sidoqogyë, nuk ka të dhëna të forta që përpjekje të tilla po ndërmerren nga organizata që kundërshtojnë qëndrimin e Clinton për rregullimin e armëve të zjarrit.
Avokatët e të drejtave të njeriut po fokusohen në kërcënimin e mundshëm që përbëjnë mbështetësit e Trump, si p.sh një burrë nga Ohajo që u tha gazetarëve se dëshironte të mbante nën mbikqyrje “njerëzit që nuk flasin gjuhën amerikane” në qendrat e votimit.
Ndërsa prania e vëzhguesve të trajnuar të palëve në qendrat e votimit është një pjesë normale e procesit, “Trump ka inkurajuar njerëzit të shkojnë aty personalisht dhe të kontrollojnë se çfarë po ndodh”, thotë Rick Hasen, profesor në universitetin e Kalifornisë, dhe një nga ekspertët më të mirë ligjorë të Amerikës. “Ata do të jenë njerëz të patrajnuar dhe të nxitur nga ajo që thotë Trump”.
“Jam i shqetësuar se mund të ketë konfrontime dhe dhunë të mundshme në qendrat e votimit”.
Përgatiti: Juli Prifti – /tesheshi.com/
