Edi Rama përdori LSI-në për të mbrojtur veten nga grupimet brenda Partisë Socialiste. Kështu u shpreh Monika Kryemadi, kryetare e LSI-së, duke iu referuar 4 viteve të bashkëqeverisjes me Partinë Socialiste.
“Gjatë katër viteve të kaluara, Edi Rama, çdo kërcënim që u bënte grupeve brenda partisë vet, u thoshte, unë kam LSI-në, kam Ilir Metën, nuk më interesoni ju. Tashmë nuk ka më LSI-në, se Ilir Metën edhe mund ta ketë, pasi ai është President. Kam parasysh firmosjet e dekreteve që z.Meta i bëri menjëherë pa kaluar sekonda. Nëse deri dje, LSI-ja dhe Ilir Meta ishin një mburojë ‘antiplumb’ ndaj qëndrimeve apo sulmeve që i bëheshin z.Rama, sot ai nuk ka gjë tjetër më”, theksoi ajo për tpz.
Në vijim të akuzave, Kryemadhi u shpreh se të vetmen mburojë që ka sot Rama janë bandat e krimit të organizuar, oligarkët, të cilët u ka shtruar në tepsinë e tij qeverisëse.
“Çdo grup oligarkësh apo çdo grup mafioz kanë përfaqësuesit e tyre në ministri, për të ndjekur aferat e tyre korruptive dhe për të ndjekur gjithë procesin e tyre”, tha ajo. /tesheshi.com/
