Pas dy gjysmëfinaleve të para të Champions League-s, të luajtura në mbrëmjet e së martës dhe së mërkurës, është ravijëzuar dhe finalja. Ashtu siç Reali fitoi bindshëm mbrëmë në fushën e vet ndaj Atletikos, dhe Juventusi kthehet sonte me një fitore po kaq bindëse nga fusha e Monakos.
Takimi mes Monakos dhe Juventusit ka përfunduar 0-2 për torinezët, që janë pranë finales së aktivitetit.
Gonzalo Higuain ka qenë shënuesi i dy golave, një në pjesën e parë e një të dytën. Gola që kanë ardhur në momentin e duhur, duke frenuar dhe iniciativën e vendasve.
Monako u shfaq e pafuqishme ndaj një Juventusi të mirëvendosur në fushë. Edhe atëherë kur u krijuan raste të pastra para portës, qe Buffon që reagoi mirë dhe shmangu rrezikun.
Kjo humbje e bën gati të pamundur për Monakon një pjesënarrje në finalen e Kardifit, veç po qe se në Torino ndodh ndonjë përmbysje krejt e pamenduar.
Përndryshe, torinezët, ashtu si me Barcelonën më herët, qenë tepër të përpiktë në detyrat taktike, bashkuar kjo dhe me një shfrytëzim mjaft të mirë të mundësive të krijuara.
Nëse për Realin mund të ketë pikëpyetje për ndeshjen e dytë në një terren të tillë si ai i “Vicente Calderon”-it, për Juventusit duket shumë më e pakomplikuar tani vajtja në finale. /tesheshi.com/
