Francezët e Monakos dhe spanjollët e Atletikos së Madridit u bënë mbrëmë çerekfinalistët e fundit të turneut më me prestigj të futbollit në Europë.
Nëse fati nuk qe me një tjetër ekip spanjoll, ndërsa PSG-ja u eliminua nga Barcelona një javë më parë, nuk ngjau kështu me Monakon, që kaloi pengesën e quajtur Mançester Siti.
Një dështim i Guardiola-s, të cilit nuk i kishte ndodhur më parë që me skuadrat e tij të eliminohej në Champions League që në një të tetat. Dështim i Mançester Sitit, që bën hapa prapa, teksa një vit më parë shkonte gjer në gjysmëfinale.
Humbjes 5-3 në takimin e parë, Monako iu përgjigj me një fitore 3-1, që i dha mundësi të kalonte në çerekfinale.
“Luajtëm në mënyrë të jashtëzakonshme në pjesën e dytë, por harruam të bëjmë kështu në të parën. Normalisht luajmë në një nivel të mirë, por këtu nuk e bëmë. Do të mësojmë. Ekipi nuk ka shumë përvojë. Nganjëherë duhet të jemi të veçantë dhe me fat. Ne nuk ishim!”, qe shfajësimi i Pep Guardiola-s pas ndeshjes. Eliminim që e sjell pranë dështimit sezonin e tij të parë te Mançester Siti.
Atletiko e Madridit – Bajer Leverkusen pati një të veçantë: qe e vetmja ndeshje pa gola e një të tetave. E meritë për barazimin 0-0 ka patjetër Oblak, portieri i Atletikos, që bëri një varg pritjesh të shkëlqyera në pjesën e dytë.
Atletiko e siguroi kualifikimin falë fitores 2-4 në takimin e parë, e kështu që për të katërtin sezon arrin në çerekfinale, me synim të vetëm fitimin e trofeut.
Tre ekipe spanjolle, Reali i Madridit, Atletiko e Madridit dhe Barcelona, dy ekipe gjermane, Borusia e Dortmundit dhe Bajerni i Mynihut, një ekip italian, francez dhe anglez, përkatësisht, Juventusi, Monako dhe Lestër Siti, do të mësojnë pas shortit të së premtes se kë do të kenë përballë në çerekfinale të Champions League-s. /tesheshi.com/
