Turneu i parë Grand Slam i vitit do të mbahet mend si për eliminimin e numrave një dhe dy të botës, Andy Murray dhe Novak Djokovic, ashtu dhe për daljen në finale të dy ish-numrave një, Roger Federer dhe Rafael Nadal.
Australian Open i këtij janari do të ishte spektakolar pikërisht për kthimin në një finale të dy tenistëve që vitin e shkuar kishin vuajtur fort nga dëmtimet, aq sa Federer nuk kishte luajtur në ndeshje zyrtare prej gjashtë muajsh.
Finalja e femrave mes motrave Williams dhe ajo e meshkujve mes Federer-it dhe Nadal-it qenë vula e një turneu fantastik.
Te meshkujt, të dy finalistët, mbi të tridhjetat tashmë, erdhën pas gjysmëfinaleve të luajtura në pesë sete, për ta luajtur dhe finalen e së dielës të tillë, gjer në fund, kur do të fitonte Federer 3-2.
I pari Grand Slam i fituar nga zviceriani pas pesë vitesh, i pesti në Australian Open.
Për të gjithë të apasionuarit e tenisit, momentet e finales përcillen në këtë bllok fotografish. /tesheshi.com/
