Kryetari i PD-së Lulzim Basha duket se është ndarë pa marrëveshje me shefen e diplomacisë së BE-së, Federica Mogherinin, në një takim që ka qenë një kafe në bar të hotel Rognerit, pasi përfundimisht Basha nuk pranoi që të jetë prezent ambasadorja Romana Vlahutin.
Vetë Basha nuk bëri të ditur se si ka qenë përgjigja e shefes së diplomacisë së BE-së, por tha se kush nuk është me kauzën e PD-së, është me krimin dhe drogën.
“Shpresa ime është që faktori ndërkombëtar të ndërhyjë për të krijuar qeveri teknike”, tha Basha në prononcimin për gazetarët pas takimit.
“Zonja Mogherini do të shprehet vetë, por mund t’ju them se kauza jonë, kauza e qytetarëve shqiptarë ka mirëkuptim dhe mbështetje totale nga të gjithë ata që i duan të mirën Shqipërisë, ata që na kanë shoqëruar në 26 vite tranzicion, e kuptojnë se me krimin në pushtet dhe me paratë e drogës, është një pacient me kancer që ka nevojë për një ndërhyrje të thellë. Shpresa ime është që faktori ndërkombëtar të ndërhyjë për të krijuar qeveri teknike”, tha kreu i PD-së.
Tashmë pritet dhe qëndrimi final i Mogherinit, që nuk është vështirë të kuptohet. Ajo dhe më parë, në takim me studentët, u shpreh se politika duhet të bëhet në Kuvend.
Disa zhvillime në politikën e Tiranës paraditën e së premtes, ku mes mazhorancës dhe opozitës u dhanë sinjalet për dialog, gjë që ndodhte në prag të ardhjes së Mogherinit, nuk u finalizuan me mbylljen e çadrës. Basha iu kthye në mesditë ultimatumit për qeveri teknike, duke e mbajtur sërish çadrën ngrehur. /tesheshi.com/
