Federika Mogherini, shefe e diplomacisë së BE-së ka mbledhur të gjithë ambasadorët e Bashkimit Europian nëpër botë dhe ka deklaruar qartë e pastër se “Ballkani nuk është obori i prapëm i Europës por prioriteti i katërt i saj”.
Italiania që drejton politikën e jashtme dhe sigurisë së Unionit, që lufton çdo ditë me izolacionistët e ka bërë të qartë se “Europa ka më shumë për të humbur nëse lë Ballkanin jashtë, por fiton shumë nëse e përfshin atë në projektin e saj”.
“Ky vit solli tensione të mëdha në shumë vende të Ballkanit. Patëm disa kriza akute, por në fund të ditës partnerët tanë i menaxhuan ato duke konfirmuar vullnetin e tyre dhe kapacitetin për të avancuar drejt rrugës së BE-së. Ne i kemi ndihmuar dhe do të vazhdojmë ta bëjmë atë. Pse? Sepse besojnë në popullsinë e këtij rajoni që po kërkon nga udhëheqja e tyre që ta drejtojë në rrugë të drejtë drejt BE-së”, tha Mogherini.
Shefja e diplomacisë së BE-së deklaroi se ndoshta është e dhimbshme që të flitet për pajtimin dhe marrëdhëniet e mira por Brukseli do të ofrojë vullnetin dhe buxhetin e tij për të zgjidhur problemet që dalin.
“Shumë prej nesh e konsiderojnë Ballkanin, si kopshti ynë apo oborri i prapëm që ne duhet ta ujisim. Jo Ballkani është pjesë e Europës dhe popujt e saj do të përfitojnë ndihmën tonë, prej buxhetit që japin taksapaguesit europianë. Ky është vullneti ynë i palëkundur dhe ne do të marrrim vendimet e duhura në Parlamentin Europian, Këshillin Europian por edhe në Komisionin Europian”, deklaroi Mogherini në konferencën treditore që nisi dje në Bruksel ku pritet të flasin figura të rëndësishme të Europës politike.
“Kemi parë që ne bëhemi të djeshëm kur vijnë flukset emigratore. Madje jemi gati që të mos pyesim fare për paratë kur bëhet fjala për sigurinë. Dakord, po sikur ne të investojmë për sigurinë tonë çdo ditë, me një plan të invetojmë në Ballkan? Atëherë do të shikojmë që ai rajon nuk do të jetë problem ynë, por ka shumë gjasa që të jetë partner i qëndrueshëm.
Ndaj ne, pra Komisioni Europian, shtetet anëtare dhe të gjithë së bashku jemi të vendosur që të kryejmë investime të rëndësishme në Ballkan, që në fund të fundit janë investime të rëndësishmne për qytetarët tanë. Sa më pak problem, sa më pak emigracion i pakontrolluar, sa më pak krime, sa më pak varfëri. Kjo është formula apo synimi ynë tashmë i pajisur me vullnetin politik të të gjithëve ne”, tha Mogherini.
Ajo bëri të ditur se ka investuar edhe personalisht që këto ditë të sjellë në Bruksel Aleksandër Vuçicin dhe Hashim Thaçin, në mënyrë që të nisë mbyllja finale e nyjës së Kosovës, Por bëri të ditur se do të jetë një process dhe jo thjesht një hap.
Bashkimi Europian ka ndërmarrë një hap të fuqishëm për të investuar në folenë e problemit për të mos e importuar atë.
Vetëm për Afrikën, nga ku çdo ditë nisen varka të panumërta me klandestinë, BE ka miratuar 44 miliardë euro për Libinë, Çadin, Nigerinë, Tunizinë e Marokun, nga ku nisen klandestinët.
Për Ballkanin shifra flitet se do të shkojë deri në 10 miliardë euro, pjesa më e madhe investime të kompanive të mëdha private, por edhe fonde të BE për infrastrukturën siç janë projektet e autostradës së kaltër në Shqipëri, rrugës Beograd- Sarajevë, Nish-Prishtinë etj.
Në një takim dje në Paris Mogherini deklaroi se “nuk kemi nevojë për një Plan Marshall pasi kemi të gatshëm një plan tonin që është shumë i mirë”. /tesheshi.com/
