Ndërkohë që Kryeministri i Kosovës Isa Mustafa dhe homologu i tij serb kanë folur në telefon, në Prishtinë ka mbërritur shefja e diplomacisë së Bashkimit Europian Federica Mogherini, në një mision diplomatik për të theksuar se Kosova është pjesë thelbësore e politikës së BE. Kjo vizitë vjen pas konferencës së djeshme me ministrant e Ballkanit e drejtuar nga Komisioneri për Zgjerimin, Johanes Hahn.
Kryeministri i Kosovës, Isa Mustafa, dhe kryeministri i Serbisë, Aleksandar Vuçiç, kanë biseduar mbrëmë me telefon, njofton agjencia serbe e lajmeve, Tanjug. Sipas këtij burimi, ata biseduan rreth bashkëpunimit ndërmjet Beogradit e Prishtinës si dhe mbi pozitën e serbëve në Kosovë.
Mustafa e Vuçiç, thekson Tanjugu, janë pajtuar që të gjitha problemet duhet të zgjidhen përmes dialogut dhe se pas vendosjes së kontakteve direkte, në të ardhmen të komunikojnë drejtpërdrejtë mbi të gjitha problemet potenciale.
Përfaqësuesja e Lartë e Bashkimit Evropian për Punë të Jashtme dhe Politika të Sigurisë, Federica Mogherini, ka mbërritur sot në Prishtinë në një mision diplomatic ku ka nisur takimet me autoritetet më të larta të Kosovës. Sipas deklaratave zyrtare në kryeqytetin kosovar, “do të bisedohet lidhur me bashkëpunimin e ngushtë me Bashkimin Evropian dhe lidhur me axhendën evropiane të Kosovës”.
Federica Mogherini do të takohet në orën 20:00 me Zv/Kryeministrin dhe Ministrin i Punëve të Jashtme, Hashim Thaçi, ndërsa gjatë pasditës do zhvillojë edhe takime të tjera me përfaqësues politikë e institucionalë të Kosovës, përfshirë përfaqësuesit e komunitetit serb.
Zv/kryeministri dhe ministri i Punëve të Jashtme, Hashim Thaçi, në të parën vizitë si bartës i posteve të reja pas zgjedhjes së qeverisë së re të Kosovës në dhjetor 2014, të zhvilluar në Strasburg dhe Bruksel, është takuar me Zv/Presidenten e Komisionit Evropian, njëherit edhe Shefe e Politikës së Jashtme të BE-së, Federica Mogherini.
“Kishim një mundësi të mirë për të këmbyer pikëpamjet tona mbi përparimet në Kosovë. Jemi pajtuar që, tani pas formimit të qeverisë në Prishtinë, puna duhet të vazhdojë me dinamikë të shtuat drejt axhendës evropiane së reformave, në mënyrë që të arrihet përparim i mirë gjatë vitit të ardhshëm, si në rrafshin e zhvillimit të brendshëm, ashtu edhe në rrugëtimin drejt BE-së”, është cituar në një komunikatë për media Mogherini pas takimit me Thaçin.
Shtypi kosovar sot thekson se, më shumë se 100 ditë kanë kaluar prejse ish-ministrja e Jashtme e Italisë, Federika Mogherini, ka nisur mandatin e saj në postin e Nënkryetares së Komisionit Evropian dhe Përfaqësueses së Lartë të BE-së për Politikë të Jashtme dhe Siguri.
Mogherini për herë të parë në këtë cilësi viziton Kosovën dhe Serbinë, dy vende të cilat zënë një hapësirë të rëndësishme në axhendën e saj, pasi ajo ka marrë përsipër edhe lehtësimin e dialogut në nivel të lartë mes këtyre dy shteteve, apo, siç thonë në BE, “mes Beogradit dhe Prishtinës”.
