Një ditë pas rekomandimin pozitiv për liberalizimin e vizave, përfaqësuesit evropian kanë qëndruar në Kosovë ku kanë dhënë mesazhe të qarta se nuk duhet të keqpërdoret vendimi i dhënë dje për vizat.
Komisionari evropian, Dimitris Avramopoulos, në konferencën e përbashkët me kryeministrin Isa Mustafa dhe përfaqësuesen e BE-së Frederica Mogherini ka thënë se Kosova ka bërë progress dhe ka plotësuar kushtet për vizat por se duhet të punoj ende që të ratifikoj Demarkacionin me Malin e Zi dhe të punoj në sundimin e rendit dhe të ligjit.
“Liberalizimi i vizave e sjell Kosovën më afër Evropës duke bërë bashkëpunim në shumë fusha. Lëvizja e lirë shoqërohet edhe me disa obligime dhe tani do të fillojmë kampanjën për mos abuzimin e lëvizjes pa viza.
Ne presim që të vazhdojmë dialogun në këtë fushë, por edhe çështjen që lidhen me drejtësinë dhe të gjitha fushat.
Autoritet e kanë për obligim të mbajnë një kampanjë që të informojnë qytetarët se cilat janë të drejtat e tyre lidhur me çështjen e liberalizimit të vizave. Qytetarët e Kosovës duhet të mbrojnë të drejtat e garantuara që propozimi hyn në fuqi”, ka thënë Avramapulos.
Mogherini: Kosova është Evropë
Përfaqësuesja e Lartë e Bashkimit Evropian për Punë të Jashtme dhe Politika të Sigurisë, njëherësh zëvendëspresidente e Komisionit Evropian, Federica Mogherini tha se Kosova është vend në zemër të kontinentit evropian, prandaj rruga e Kosovës shkon nga BE-ja.
“Kosova është Evropë, i duhet Kosovës rruga drejt BE-së. Ky vend është në zemër të Kontinentit. Kosova e ka fituar rekomandimin që të lëvizni lirshëm pa viza. Kam biseduar me kryeministrin dhe do të bisedoj edhe me presidentin për rekomandimin e vizave. Nuk ka mënyrë më të mirë që sot është ditë e Evropës, dhe ta festoj këtu. BE përfaqëson procesin më të suksesshëm integrues që e sheh bota. Rezultatet vijnë për njerëzit, sepse vlerat vijnë për gjeneratat e reja dhe këtë e kemi obligim”, ka shtuar ajo.
Mustafa: E ardhmja e Kosovës në BE
Kurse, kryeministri Isa Mustafa, deklaroi se ardhmja e Kosovës është në gjirin e familjes evropiane dhe se Kosova e sheh Evropën si shtëpi të saj.
“Liberalizimi i vizave kërkon që çdo qytetar i Kosovës të respektoj vendimin për zonën Shengen”, tha Mustafa.
Ai foli edhe për dialogun me Serbinë, ku tha se dialogu dhe fqinjësia e mirë janë vlera të çmuara evropiane dhe Serbia duhet të heq dorë nga kërkesat e saj për ta bllokuar anëtarësimin e Kosovës në organizata evropiane.
Përgatiti: Blendi Gashi /tesheshi.com/
