Gruaja në krye të diplomacisë së Brukselit, Federica Mogherini, i ka thurrur elozhe kryeministrit Rama pas një takimi mes tyre, ku kryediplomatja europiane vlerësoi atë që e quajti “lidershipi i tij” në ecjen para të Shqipërisë.
“Është një kënaqësi për mua të mirëpres përsëri kryeministri Rama, në një moment veçanërisht të rëndësishëm për rrugën e Shqipërisë drejt BE-së. Në lidershipin e tij, Shqipëria ka bërë një punë të jashtëzakonshme, veçanërisht në Reformën e Drejtësisë, luftën kundër drogës dhe korrupsionit, një punë që ne e mbështesim e që duhet të vazhdojë përpara dhe kjo është një punë që mund të hapë rrugën drejt hapave të mëtejshëm të procesit të integrimit në BE. Jam e lumtur që kam përsëri këtë mundësi për të diskutuar së bashku mënyrën se si këto hapa mund të shndërrohen në një opsion të vërtetë në fillim të vitit të ardhshëm”, tha Mogherini, pasuar nga Rama në shprehjen e besimit për hapjen e negociatave vitin e ardhshëm.
“Jam krenar që kam ardhur këtu me më shumë rezultate të mira dhe jam i sigurtë që do të kemi edhe më shumë në muajt e ardhshëm”, tha kreu i ekzekutivit shqiptar.
Para se të takohej me Mogherinin, Rama foli në një konferencë europiane, ku tha se vetëm integrimi do mund të shëronte plagët e së kaluarës për rajonin. /tesheshi.com/
