Shefja e Politikës së Jashtme të BE-së, Federica Mogherini, konfirmoi të hënën se bisedimet rreth anëtarësimit të Turqisë në Union do të vazhdojnë, pavarësisht përplasjes mes kancelares gjermane Angela Merkel dhe rivalit të saj të qendrës së majtë Martin Schulz, rreth ofertës së Turqisë për anëtarësim.
Duke folur në Forumin e 12-të Strategjik të Bledit në Slloveni, Mogherini tha se vendet e BE-së mund të diskutojnë për të ardhmen e ofertës së Turqisë për anëtarësim në BE, megjithatë, bisedimet rreth pranimit do të vazhdojnë.
“Ne nuk jemi gjithmonë dakord për çdo gjë. Ka disa çështje që i tërheqin pozicionet tona shumë larg, por bisedimet vazhdojnë.
Përveç bisedimeve rreth anëtarësimit, BE dhe Turqia janë gjithashtu partnerë rajonalë, ndonjëherë partnerë të vështirë, megjithatë, ne jemi duke punuar së bashku në shumë kapituj të ndryshëm”, tha Mogherini.
Ajo shtoi se është e rëndësishme të shihen marrëdhëniet midis bllokut dhe Turqisë përtej vërejtjeve të bëra gjatë fushatave zgjedhore.
Gjatë debatit të televizionit të së dielës, Merkel tha se do t’i kërkojë BE-së që të anullojë bisedimet e anëtarësimit me Turqinë, në një kohë të rritjes së tensioneve ndërmjet Berlinit dhe Ankarasë.
“Nuk shoh se ata do t’i bashkohen ndonjëherë BE-së dhe kurrë nuk kam besuar se kjo do të ndodhë,” tha ajo gjatë debatit.
“Është e qartë se Turqia nuk duhet të bëhet anëtare e BE-së”, tha Merkel, pasi Schulz pohoi se ai do të ndalonte ofertën e Turqisë për t’u bashkuar me BE-në nëse ai zgjidhet kancelar.
“Përveç kësaj, do të flas me kolegët e mi për të parë nëse mund të arrijmë një qëndrim të përbashkët për këtë, në mënyrë që t’i përfundojmë këto bisedime rreth pranimit”, shtoi Merkel.
Ministri i jashtëm turk kritikoi politikanët gjermanë për vëmendjen e tyre më të madh rreth Turqisë sesa në problemet e shtetit të Gjermanisë. /tesheshi.com/
