Gruaja në krye të diplomacisë së Brukselit, Federica Mogherini, ia ka kushtuar Ballkanit Perëndimor një pjesë të fjalimit të saj në konferencën e përvitshme të ambasadorëve të BE-së.
Duke iu referuar çështjes më të nxehtë të ditës, raporteve mes Serbisë dhe Kosovës që duan të përafrohen nëpërmjet një marrëveshjeje historike, Mogherini tha se ka ardhur koha për t’i dhënë fund konfliktit mes tyre.
“Besoj se ekziston një mundësi reale që presidentët Vuçiç dhe Thaçi të arrijnë një marrëveshje që do të adresojë të gjitha çështjet e hapura mes Beogradit dhe Prishtinës. Një marrëveshje gjithëpërfshirëse, detyruese ligjërisht për të normalizuar marrëdhëniet mes dy palëve. Një marrëveshje që të jetë në përputhje të plotë me ligjin ndërkombëtar, e që do të mund të ndihmojë në qendrueshmërinë e të gjithë rajonit. Më lejoni të përmend edhe data, sepse viti i ardhshëm 2019 do të jetë edhe 20-vjetori i luftës në Kosovë. Për këtë arsye besoj se ka ardhur koha që t’i jepet fund atij konflikti”, tha kryediplomatja e Brukselit, cituar nga TCH.
Ndërkohë, ajo nuk ka lënë mënjanë dhe Shqipërinë, duke kërkuar këmbëngulshëm që Tiranës e Shkupit t’u çelen me patjetër negociatat.
Dhe ndër deklarimet më të forta ishte ajo se askush nuk mund të diktojë në Ballkan veç faktorit europian.
“Më lejoni t’u them diçka edhe atyre që kanë frikën se fuqi të tjera po bëhen gjithnjë e më të pranishme në rajon: për sa kohë që ne të jemi të pranishëm në rajon, nuk ka hapësirë për të tjerë”, tha gruaja e diplomacisë së BE-së. /tesheshi.com/
