Moderna paditi Pfizer dhe partnerin e saj gjerman BioNTech, duke pretenduar se në zhvillimin e vaksinës së parë të miratuar nga SHBA kundër COVID-19, ata shkelën patentat e saj dhe kopjuan teknologjinë që ajo kishte zhvilluar vite përpara pandemisë.
Padia u ngrit në Gjykatën e Qarkut të Massachusetts dhe në Gjykatën Rajonale të Dusseldorfit, tha Moderna të premten.
Kompania po kërkon kompensim monetar, por nuk e specifikoi shumën, raportoi Reuters.
“Ne po i ngremë këto padi për të mbrojtur platformën inovative të teknologjisë mRNA që ne fillimisht zhvilluam, investuam miliarda dollarë në krijimin e saj dhe patentuam mbi dhjetë vjet përpara pandemisë COVID-19,” tha CEO i Moderna, Stephane Bancel.
Moderna dhe Pfizer në bashkëpunim me BioNTech janë dy kompanitë që kanë zhvilluar për herë të parë një vaksinë kundër virusit korona, kujton Reuters.
Zhvillimi i shpejtë i paprecedentë i vaksinës
Vetëm dhjetë vjet pasi u themelua, Moderna zhvilloi teknologjinë ARN (mRNA) që mundësoi zhvillimin e shpejtë të paparë të vaksinave kundër COVID-19.
Procesi i licencimit, i cili zakonisht zgjat me vite, u përfundua brenda muajve, falë kryesisht një përparimi të madh në zhvillimin e vaksinave mRNA, të cilat mësojnë qelizat njerëzore se si të prodhojnë një proteinë që shkakton një përgjigje imune.
BioNTech e Gjermanisë gjithashtu eksploroi zonën kur u bashkua me gjigantin farmaceutik amerikan Pfizer.
Administrata Amerikane e Ushqimit dhe Barnave (FDA) miratoi vaksinën e virusit korona të Pfizer/BioNTech nën një procedurë urgjente në dhjetor 2020 dhe nga Moderna shtatë ditë më vonë.
Moderna tani pretendon se Pfizer dhe BioNTech kopjuan pa leje teknologjinë mRNA që Moderna patentoi midis 2010 dhe 2016, shumë kohë përpara se COVID të shfaqej në fund të 2019 dhe të përhapej në fillim të 2020.
Në fazën fillestare të pandemisë, Moderna njoftoi se nuk do të insistonte në të drejtat e pronësisë intelektuale për të lejuar të tjerët të zhvillojnë vaksinat e tyre, veçanërisht për vendet me të ardhura të ulëta dhe të mesme.
Në mars të këtij viti, ajo ndryshoi kursin, duke thënë se priste që kompanitë si Pfizer dhe BioNTech të respektonin të drejtat e saj të pronësisë intelektuale, duke shtuar se nuk do të kërkonte kompensim për aktivitetet para 8 marsit 2022. /tesheshi.com/
