Politika me drogën është kthyer në një retorikë që zgjat prej vitesh por jo në fushata elektorale. Partitë shqiptare, kur ka zgjedhje duan të marrin vota edhe nga trafikantët.
Ajo që bie në sy është se asnjëra prej partive, si PS-ja kur kërkonte pushtetin e as PD-ja që e kërkon sot, nuk japin një model sesi do ta luftojnë drogën dhe kultivimin e hashashit në Shqipëri.
Kur dikush e ka seriozisht, ka ofruar një model, e ka zbatuar; dikujt i ka ecur e dikujt jo.
Shembulli më i fundit është presidenti i Filipineve, Rodrigo Duerte.
Ai mori famë si kryebashkiak i qytetit më të madh në vend, Davao, me modelin e dorës së hekurt që ndoqi për të zhdukur krimin dhe drogën në qytet.
Vetëm pas disa vitesh, Davao u bë një nga qytetet e botës me kriminalitetin më të ulët.
Këtë model, Duerte po e zbaton edhe në të gjithë Filipinet, por çuditërisht, dhe jo aq çuditërisht, po merr akuza “për shkelje të të drejtave të njeriut”.
Thelbi i politikës së tij është “tolerancë zero” ndaj trafikantëve.
Një nga citatet e tij më të famshme është: “Nëse je një kriminel apo trafikant dhe ke në shënjestër njerëzit e ndershëm të qytetit tim, ngulite mirë në kokë se të pret vdekja nga duart e mia!”
Si kryetar bashkie, Rodrigo Duerte qëndroi nga viti 1988 e deri në vitin 2010. Njerëzit nuk donin ta hiqnin, por ai nuk mund të rizgjidhej dhe gjeti si zgjidhje që të vendosë vajzën e tij dhe vetë qëndroi si zëvendës de jure dhe kryebashkiak de fakto.
Në qershor të këtij viti nisi mandatin si President i Filipineve pas fitores së zgjedhjeve me shumicë dërrmuese votash.
Ai fitoi me një model që ndoshta ka hapur shumë polemika, madje edhe viktima, por që gjithsesi ka tronditur botën e krimit dhe po jep rezultatet e saj.
Po ne çfarë modeli do të kemi? /tesheshi.com/
