Nga Blendi Gashi
Deputetët e Vetëvendosje-s dhe LDK-së për disa orë në seancën e së martës bën zhurmë ku kërkuan nga kryeministri Haradinaj të shkarkojë ministrin e Bujqësisë, Nenad Rikalo, i cili dyshohet se ka rrahuar e maltertuar shqiptarët gjatë luftës së fundit.
Por kur erdhi koha për të votuar mocionin për shkarkimin e Rikalos, opozita tregoi se ishte tërësisht e pakordinuar pasi vetëm 26 deputetë votuan “pro” shkarkimit, kurse më shumë se gjysma e opozitarëve ose nuk ishin në seancë ose nuk mbështetën rrëzimin e Rikalos.
Vlen të thuhet se vetëm 16 deputetë të Lëvizjes Vetëvendosje votuan “pro”, pra vetëm gjysma, ndërsa disa të tjerë nuk ishin prezent e disa ishin në sallë në momentin e votimit por nuk votuan.
Dhe pas kësaj plasën akuza se si opozitarët po bëjnë lojë me thirrje të interpelancave e ngritjen e mocioneve, rastin konkret ndaj Rikallos për ta rrëzuar e më pas nuk votojnë pro.
Arsyetimi i VV-së…
Por Vetëvendosje thotë se në seancën e së martës ku u votua mocioni ka pasur parregullsi dhe nuk ka funksionuar sistemi. Në këto kushte, VV kërkoi përsëritjen e votimit, por kjo kërkesë nuk u aprovua nga kryesuesi i seancës Xhavit Haliti.
“Në lidhje me votimin e djeshëm mendoj se ka parregullësi sepse në mesin e deputetëve të VV, gjashtë këtu që kanë qenë present dje nuk iu ka funksionu sistemi. Në dokumentin që na ka ardhë po del që të gjithë nuk kanë qenë present në sallë. Konsideroj se votimi duhet të përsëritet. Mendoj se kemi bazë ta konsiderojmë të parregullt dhe duhet përsëritur votimi”, tha deputeti i VV-së Liburn Aliu.
Një sqarim lidhur me votimin e mocionit të djeshëm e ka bërë edhe Fatmira Mulhaxha-Kollçaku, deputete e VV-së e cila po ashtu thotë se në seancën në fjalë kanë ndodhur parregullësi.
“Duke pasur parasysh që në disa mediume është theksuar që unë nuk isha e pranishme, dje, në seancë, nuk është e vështirë që të vërtetohet e kundërta. Seanca ishte drejtpërdrejt në TV.
Sa i përket votimit të mocionit, atë e kanë përcjellur parregullësi të shumta. Duke pasur parasysh se ishte dita e parë e votimit me kartelë, shumë prej tyre nuk u funksionalizuan, si zakonisht, nuk u ftuan deputët që ishin jashtë sallës, që të futen brenda, etj. Së paku pesë deputetë të Lëvizjes Vetëvendosje, përfshirë edhe mua, votuam pro me ngritje dore. Fatkeqësisht, kjo nuk u mor fare në konsideratë”, shkruan ajo në Facebook.
Reagimi i LDK-së…
Por e gjithë kjo mjegullnajë e krijuar dhe mungesa e votave nga VV për ta rrëzuar Rikallon nuk po i pëlqejnë LDK-së parti e cila ngriti mocionin edhe pse deputetë të saj munguan në seancë.
Shefi i grupit parlamentar të LDK-së, Avdullah Hoti, thotë se mocioni i ngritur nga partia e tij do të kalonte po ta kishin dhe votën e Vetëvendosje-s. Ai tha se duhet pyetur kjo parti se cila ishte arsyeja për mosvotim të mocionit.
“Shumica, saktësisht dy të tretat e deputetëve të LDK-së kanë qenë në sallë dhe kanë votuar për mocionin e propozuar nga ne. Sikur të kishim pjesëmarrje të njëjtë edhe nga LVV, ky mocion do të kalonte. besoj se është e udhës të pyetet LVV për motivet e mosvotimit të këtij mocioni, në kohën kur pozita i kishte vetëm 40 vota”, ka deklaruar Hoti për mediat kosovare.
Deputetët e Vetëvendosje-s, të cilët ishin në sallë, por që në transkriptet e Kuvendit nuk tregohet se votuan për janë: Aida Dërguti, Fisnik Ismaili, Dukagjin Gorani, Liburn Aliu, Ali Lajçi, Sami Kurteshi, Fatmire Kollcaku, Valon Ramadani, Shqipe Pantina, Drita Millaku dhe Saranda Bogujevci.
Sipas transkriptit në sallë në momentin e votimit nuk kanë qenë as deputetët e LDK-së, Imet Rrahmani, Ramiz Kelmendi, Naser Osmani, poashtu dy deputetët e AKR-së, Islam Pacolli e Labinot Tahiri, deputeti i Alternativa-s Ilir Deda.
Kurse nga koalicioni PAN në sallë në momentin e votimit nuk kanë qenë, Daut Haradinaj, Andin Hoti, Haxhi, Shala, Abyl Salihu, Xhavit Haliti, Zenun Pajaziti, Mexhide Mjaku-Topalli, Flora Brovina, Luljeta Veselaj-Gutaj e Safete Hadergjonaj. /tesheshi.com/
