Kreu demokrat Basha, në vijim të fushatës së tij mobilizuese për protestën e paralajmëruar të 16 shkurtit ishte në Valias të Bashkisë së Kamzës, e ku pretendoi se shefi i qeverisë i gënjeu për dëmshpërblimin nga përmbytjet e një viti më parë.
“E mbaj mend shumë mirë atë ditë kur reshjet arritën kulmin dhe kjo zonë u përmbyt e gjitha. Kam qenë tek shumë prej jush dhe kam parë me sytë e mi se si banesat kishin dalë tërësisht jashtë funksionit. Në krye të detyrës ishin vetëm punonjësit e bashkisë dhe kryetari i bashkisë. Asnjë zyrtar i shtetit, i qeverisjes qendrore nuk shihej. Edhe kur i kërkonin në telefon në raste emergjence nuk dukeshin.
Vetëm pas tre apo katër ditësh kur situata u qetësua, por gjendja vazhdonte të mbetej e mjerë, erdhi fantazma. Erdhi dhe lëshoi dy apo tre batuta e barcaleta, u rrahu krahun dy tre punëtorëve të bashkisë që po punonin, dhe i tha kryetarit, do të kesh fondin 700 mijë ruro që të përballosh emergjencën. Natyrisht ishte një tjetër mashtrim.
Asnjë kokërr leku nuk iu dha Bashkisë së Kamzës. Asnjë cent dëmshpërblim 700 familjeve të cilët u përmbytën për shkak jo vetëm të motit, por pakujdesisë dhe neglizhencës së Edi Ramës”, u deklaroi Basha banorëve të atyshëm, duke u kërkuar që të përballen me qeverinë në protestën e 16 shkurtit. /tesheshi.com/
