Interi i Milanos dhe Mançester Junajtedi po përjetojnë ditë të errëta. Italianët, të 12-t në Serinë A, shkarkuan trajnerin Frank de Boer, por as kjo nuk u erdhi në ndihmë. Në Ligën e Europës pason një tjetër humbje, ndaj Sauthemptonit. Për Mourinho-n, ajo çka provoi vitin e shkuar me Çelsin nuk paska qenë asgjë ndaj asaj çka po heq me Mançester Junajtedin: vjen dhe humbja në Stamboll, ndaj Fenerbaçes.
I drejtuar përkohësisht nga trajneri i të rinjve, Stefano Vecchi, Interi luajti mbrëmë në Angli ndaj Sauthemptonit, një ndeshje e vlefshme për javën e katërt të fazës në grupe të Europa League-s. Edhe pse kaluan të parët në epërsi me të zakonshmin Icardi, italianët nuk mundën ta fitojnë ndeshjen. Handanovic priti një 11-metërsh në fundin e pjesës së parë, por nuk i ndaloi dot në pjesën e dytë golin e Van Dijk-ut dhe autogolin e Nagatomo-s.
Humbja 2-1 e lë Interin në vend të fundit në grupin K, me vetëm 3 pikë, me një fitore e tre humbje!
Mbrëmje ferri në “Şükrü Saracoğlu” të Stambollit për Mançester Junajtedin. Fenerbahçe fiton 2-1 në stadiumin me mbi 40.000 mijë tifozë, rekordi në këtë sezon për skuadrën e njohur turke.
Dy gola të shkëlqyer nga lojtarët e Fenerbahçes, nga Sow dhe Lens. I vetmi lajm i mirë për “djajtë e kuq” është rigjetja e golit prej Rooney-t, që shkurtoi diferencën në fundin e lojës.
“Po luanim një miqësore vere,” ishte ajo çfarë mundi të thoshte Mourinho pas ndeshjes për paraqitjen e shëmtuar të skuadrës së tij.
Megjithatë, edhe pse gjendet në vend të tretë në grupin A, Mançester Junajtedi i ka të tëra mundësitë për të shkuar më tej në këtë aktivitet.
Në tërësi, rezultati më i thellë i 24 ndeshjeve të mbrëmshme në Ligën e Europës ishte ai i ndeshjes Anderleht – Mainz: 6-1!
Dy sfidat me më shumë gola qenë Atletik Bilbao – Genk, fituar nga vendasit 5-3, dhe Gent – Shakhtar i Donjeckut, e mbyllur me të njëjtin rezultat, por për miqtë, 3-5.
Roma fitoi thellë, 2-4, në transfertë ndaj Austrisë së Vjenës, Ajaksi mposhti 3-2 Selta Vigon, Standard Liezhi e mundi pastër, 0-3, Panathinaikosin në Athinë, e po 3-0 qe rezultati final i takimit mes Fiorentinës dhe Sllovan Liberecit.
Nga fitoret në fushën kundërshtare spikatën po ashtu ajo e Karabakut të Ansi Agollit në Selanik ndaj PAOK-ut, 0-1, e Salcburgut ndaj kryesuesve të kampionatit francez, Nisës, 0-2, dhe e turqve të Osmanllësporit në Spanjë ndaj Vilarealit, 1-2. /tesheshi.com/
