Një raport i bërë i njohur sot nga Mjekët pa Kufij i ka vënë me shpatulla pas muri vendet e BE-së për mënyrën se si e kanë trajtuar krizën e jashtëzakonshme të refugjatëve.
Dëshmi të mbledhura nga personeli e nga pacientët, si edhe të dhëna mjekësore, janë pjesë e raportit që hedh dritë mbi krizën e refugjatëve.
Sipas asaj çka shkruhet në të, reagimi i Bashkimit Europian ndaj krizës së refugjatëve është jo vetëm një “dështim katastrofik”, por u ka lënë gjithashtu terren trafikantëve të njerëzve.
Brice de le Vingne, drejtori i operacioneve të Mjekëve pa Kufij, tha sot në një deklaratë, “Jo vetëm që Bashkimi Europian dhe qeveritë europiane dështuan kolektivisht në trajtimin e krizës, por përqendrimi i tyre në politikat e shkurajimit, bashkë me reagimin e tyre kaotik ndaj nevojave humanitare të atyre që largohen, i përkeqësoi aktivisht kushtet e mijëra burrave, grave e fëmijëve të pambrojtur.”
Rrugë të sigurta dhe ligjore kanë kërkuar Mjekët pa Kufij për njerëzit që janë në kërkim të azilit, “… mungesa e ndihmës nga Europa dhe kufizimet e saj për lëvizjen vetëm i kanë shtrënguar njerëzit e dëshpëruar të vënë shëndetin dhe jetën në rrezik duke u mbështetur te shërbimet e trafikantëve dhe duke marrë rrugë të pasigurta, duke përfshirë kalimet tejet të rrezikshme detare në Mesdhe dhe në Egje.” /tesheshi.com/
