Shtetet e Bashkuara e kanë quajtur operacionin e ushtrisë së Majnmarit kundër popullsisë muslimane Rohingya, “spastrim etnik” dhe kërcënuan me sanksione kundër atyre që janë përgjegjës për ato që cilësohen si “mizori të tmerrshme”.
“Situata në shtetin verior Rakhine përbën spastrim etnik kundër Rohingya-ve,” tha sekretari amerikan i Shtetit, Rex Tillerson me anë të një deklarate, duke përdorur termin që ai e shmangu kur vizitoi Majnmarin javën e shkuar.
“Shtetet e Bashkuara po ashtu do të ndjekin përgjegjësit sipas ligjit amerikan, ku përfshihen edhe sanksione të mundshme të targetuara kundër atyre që janë përgjegjës për abuzime të tilla, që kanë larguar me mijëra njerëz drejt Bangladeshit fqinj”, thuhet në deklaratë.
Të enjten në mëngjes, ambasada amerikane në Majnmar tha se ka pezulluar përkohësisht udhëtimin për zyrtarët amerikanë drejt shtetit Rakhine, duke dhënë si arsye protestat e mundshme ndaj komenteve të Tillerson. /tesheshi.com/
