Nga Gani Gashi
Jo dhe aq e rrallë po të kihet parasysh realiteti në veriun e Kosovës, e posaçërisht në veriun e Mitrovicës: Shemsedin Miftari jeton me ndihmat sociale e qira në jug të Mitrovicës, ndërsa truallin e tij në veri e shfrytëzon Zvezdan Mihajloviq i cili ka hapur biznese.
“Para luftës shtëpinë e kam pasur në veri të Mitrovicës buzë lumit Ibër, në pjesën e rrugës në mesë të Xhamisë së Ibrit dhe Telekom Serbia”, ka thënë për portalin ‘tesheshi’, Shemsedin Miftari që vjon më tej rrëfimin e tij plot trishtim: “shtëpia e ka pas fatin e njëjtin sikurse xhamia, pra është djegur nga forcat ushtarako-policore dhe paramilitare serbe në fund të muajit prill 1999 dhe është rrafshuar përtokë po atë ditë që është rrafshuar edhe xhamia, me 2 maj”.
Dhe më pas, Shemsedini tregon për gjendjen e familjes së tij: “Jemi 8 anëtarë të familjes, por askush nuk është në punë. Jetojmë nga ndihmat sociale, paguaj qira 150 euro në muaj, ndërkohë që pronën time në veri të Mitrovicës po e shfrytëzon Zvezdan Mihajloviq nga fshatit Frashër, i cili ka hapur edhe biznes”.
Shemsedini thotë se në gjithë këto vite ka trokitur në të gjitha dyert e institucioneve të Kosovës, e më në fund Gjykata Themelore e Mitrovicës këto ditë ka nxjerrë akt-vendim ku kërkon nga serbi që të lirojë pronën, por një gjë e tillë thotë ai nuk po ndodh.
“Disa miq dhe bashkatdhetar më kanë siguruar materialin ndërtimor për ta ndërtuar shtëpinë, por uzurpatori nuk po ma liron pronën, bën biznes, ndërsa që unë jetojë me ndihma dhe qira tash e 16 vite, thotë i brengosur Shemsedin Miftari.
Sipas tij, gjykata e ka konfirmuar tashmë plotësisht se prona është e tij, ngaqë dhe tapitë e tregojnë më së miri këtë fakt, por ja që në realitet asgjë nuk ndryshon dhe absurdi vazhdon. “Unë jam duke pritur edhe pak, se serbi do ta lirojë me të mirë apo me të keq”, përbetohet shqiptari i ngratë Shemsedin Miftari.
Ai thotë se është ankuar dhe në stacionin policor të Verit, porse atje i kanë thënë se duhet edhe një vendim tjetër për ekzekutim, pra dëbim të personit.
“Trualli i im gjendet në pjesën më të bukur të Mitrovicës , pra buzë lumit Ibër në afërsi të ish-Xhamisë së Ibrit, por që serbi tash e 16 vite është duke e shfrytëzuar për biznes. Fillimisht ka hapur pikë karburanti, ndërsa tani e ka kthyer në treg ky shet pemë e perime”, thotë ai, duke u qarë me plot të drejtë: “Unë jam duke bredhur rrugëve e jetojë me ndihma, ndërsa serbi pasurohet në pronën time. Kështu nuk ka askund në botë”.
Në anën tjetër, zyrtarë të policisë së Kosovës në veri të Mitrovicës lidhur me këtë rast kanë theksuar se policia është në dijeni për rastin, gjykata uzurpatorit i ka dërguar një vendim në të cilën kërkohet nga ai që me vetë dëshirë ta lirojë pronën e uzurpuar; dhe nëse personi, pra serbi Zvezdan Mihajloviq nuk e liron atë, atëherë policia me urdhër të gjykatës do të bëjë ekzekutimin e vendimit dhe pronari i ligjshëm do ta merr pronën e tij”.
‘Deri më tani policia e Kosovës ka liruar me dhjetëra prona të uzurpuara në veri të Mitrovicës. E si gjithmonë, edhe në këtë rast policia është e vendosur që ta zbatojë ligjin”, ka thënë një zyrtari i policisë në veri të Mitrovicës. /tesheshi.com/
