Nga Musa Mustafa
Ajo që ka ndodhur së fundi në Mitrovicë nuk përngjason fare me atë që po ndodh prej muajsh në Prishtinë. Në Kuvendin Komunal, “armiqtë” e përbetuar politikë janë bërë bashkë duke kërkuar ndryshimin e pakos së Ahtisarit, pasi nuk pranojnë që Mitrovica, të quhet Mitrovicë jugore
Asambleistët e “Vetëvendosje”-s dhe ata të PDK-së e LDK-së, AKR-së, PD-së dhe AAK-së, janë bërë bashkë duke kërkuar hapjen e pakos së Ahtisaerit për të ndryshuar ligjin i cili definon se Mitrovica do të ketë dy komuna me emërtim Komuna e Mitrovicës jugore dhe veriore.
Ata kundërshtuan njëzëri propozimi e Kryetarit të Komunës së Mitrovicës, Agim Bahtiri, që Këshilli Komunal të debatojë dhe të bëjë ndërrimin e statusit të Komunës, ku Komunën e Mitrovicës do të quante Komuna e Mitrovicës Jugore, siç parashihet në pakon e Ahtisaarit.
“Kjo pikë e rendit të ditës ku parashihet ndryshim i statuti të Komunës, me qëllim të ndërrimit të emrit nga Mitrovica në Mitrovicës jugore, nuk do të kalojë dhe duhet të largohet nga rendi i ditës”, ka thënë Rrustem Musa, shef i grupit parlamentar të asamblistëve të PDK-së, kërkesa e të cilit është pranuar nga të gjitha asambleistët e Mitrovicës pa dallim partie.
“Që nga ky moment, unë si asamblist më nuk do të pranojë të marrë dokumente ose të nënshkruaj aty ku figuron emërtimi i Komunës si ‘Komuna e Mitrovicës jugore’”, ka thënë asamblisti i PD-së Vesel Neziri, duke kërkuar nga institucionet Komunale që të respektojnë statutin e Komunës dhe konform tij të sjellin edhe vendime e dokumente të tjera.
“Ai është vetëm ligj e jo Kuran e Bibël, pra mundet me u ndërrua si janë ndërruar shumë të tjera deri më sot”, ka thënë Faruk Mujka, shefi i grupit të asamblistëve të VV-së.
Të gjitha asamblistët kanë kërkuar njëzëri që Mitrovica, në emërtimi i saj zyrtar të mbetet si Komuna e Mitrovicës, e ajo në veri le të merr emrin Mitrovica, veriore, lindore apo perëndimore kanë thënë kuvendarët.
Kuvendarët po ashtu kanë kërkuar që kufijtë komunal të mbesin në bazë të pakos së Ahtisaarit e jo që vijë kufitare në mesë të dy komunave të jetë shtrati i lumit Ibër. /tesheshi.com/
