Ka 24 orë që po bëhet zhurmë e madhe në lidhje me ekstradimin “ekspres” drejt Italisë të Nezar Seitit, të ashtuquajturit “financier” i grupit të Habilajve.
Ministrja e Drejtësisë, Etilda Gjonaj ka firmosur dje urdhërin e eksdradimit, dhe Seiti është marrë në dorëzim nga dy agjentë të Drejtorisë Investigative Antimafia në Itali, DIA.
Disa qarqe në Shqipëri e kanë cilësuar këtë ekstradim si “të parregullt”, pasi mbi Seitin ekziston një hetim nga Prokuroria e Krimeve të Rënda, e cila prej dy vitesh ka hapur dhe po investigon dosjen “Habilaj”.
Pas akuzave, edhe Kryeprokurorja Arta Marku ka dërguar një grup për të shqyrtuar ligjshmërinë e ekstradimit.
Ministria e Drejtësisë, në njoftimin e saj thekson se :
“janë ndjekur me përpikmëri të gjitha procedurat ligjore të parashikuara në Kodin e Procedurës Penale, Ligjin nr. 10193 datë 3.12.2009, Konventës Evropiane të Ekstradimit, të vitit 1957, Marrëveshjen ndërmjet Republikës së Shqipërisë dhe Republikës së Italisë dhe Konventës Evropiane për ndihmë juridike dhe çështje penale.
Ministria e Drejtësisë në datë 20.10.2017, është njoftuar nga Interpoli Tiranë, mbi arrestimin e shtetasit Nezar Seiti po në datën 20.10.2017, me qëllim ekstradimin drejt Italisë, në bazë të Urdhërit Arrestit Ndërkombëtar të lëshuar nga Gjykata e Catanias, në datë 12.10.2017, për kryerjen e veprës penale “Organizatë kriminale me qëllim trafikimin e narkotikëve”, parashikuar nga legjislacioni penal italian.
Ministria e Drejtësisë në datë 24.10.2017, i ka përcjellë Prokurorisë së Përgjithshme njoftimin e Interpolit Tiranë, me qëllim kryerjen e veprimeve nga ana e Prokurorisë për të kërkuar nga autoritetet italiane dërgimin e akteve.
Ministria e Drejtësisë shqiptare, menjëherë pas marrjes së kërkesës të datës 24.11.2017 nga Ministria e Drejtësisë italiane për ekstradim të shtetasit Nezar Seiti, ia ka përcjellë atë Prokurorisë së Përgjithshme.
Prokuroria e Përgjithshme në datë 10.01.2018, ka vënë në dijeni Ministrinë e Drejtësisë lidhur me vendimin e Gjykatës së Rrethit Gjyqësor Tiranë me Nr. 1506, datë 18.12.2017, i cili ka marrë formë të prerë më datë 29.12.2017, duke vendosur miratimin e kërkesës së Prokurorisë së Rrethit Gjyqësor Tiranë për lejimin e ekstradimit të shtetasit Nezar Seiti.
Gjykata në pjesën arsyetuese të vendimit Nr. 1506 datë 18.12.2017 është shprehur se nuk ka asnjë pengesë ligjore për të mos e lejuar ekstradimin në perputhje me parashikimet ligjore të brendshme dhe ato ndërkombëtare”.
Po realisht cilat janë prapaskenat e këtij operacioni?
Dosja e Habilajve në Catania ka avancuar në fazën e dytë të saj, nga ligjshmëria e arrestit tek faktet e lidhjes së trafikut të drogës me pastrimin e parave dhe aktivitetin e zgjeruar kriminal.
Prej kohësh, lëvizjet nga agjencitë ligjzbatuese amerikane dhe europiane në lidhje me mafian shqiptare janë zhvilluar intensivisht.
DEA amerikane dhe FBI-ja thuajse kanë qepur dosje të plota mbi Klement Balilin dhe disa trafikantë të mëdhenj të kokainës që kanë lëvizur rrjetin e Greqisë.
Duket se dyshimet që janë hedhur dy vjet më parë mbi “zhdukjen” e Klemend Balilit po nisin të vërtetohen. Prej humbjes së gjurmëve të “Escobarit të Ballkanit”, ka pasur disa zhvillime të rëndësishme.
Policia italiane, ajo belge, gjermane dhe holandeze kanë arritur të kapin dy grupe të rëndësishme dhe të sekuestrojnë jo vetëm një sasi të madhe droge, por të kllaposin pjesën kryesore të rrjeteve kryesore në Europën Perëndimore.
Në rastin e dosjes “Habilaj”, lidhja për të ndjekur hetimin ishte natyrisht “llogaritari”, Nazer Seiti, i cili tashmë është në duart e drejtësisë italiane.
Sipas të dhënave, një pjesë e njerëzve të arrestuar nga disa grupe kriminale, duke nisur nga Habilajt, janë penduar dhe kanë nisur të shpjegojnë të gjithë semën e trafikut; e ç’është më e rëndësishmja, të pastrimit të parave dhe të lidhjeve tëforta të mafias shqiptare me politikën.
Seiti nuk është rasti i vetëm, pasi po dy vjet më parë, pikërisht atëherë kur i miratua Reforma në Drejtësi, një operacion i madh i policive të vendeve europiane kanë arritur të prangosin më shumë se 30 bosë shqiptarë të trafikut të drogës, të cilët kanë folur dhe dosjet e tyre janë thuajse të gatshme për të shkuar në gjykatë.
Dhe nga vendimet e këtyre gjykatave do të vijë material parafabrikat, i vërtetuar për drejtësinë shqiptare. Siç është natyrisht edhe rasti i Habilajve në Catania.
Pra atë që nuk e bëri Adriatik Llalla për 5 vjet, po e bëjnë organet e drejtësisë së vendeve të BE-së, të cilat po shqyrtojnë me precizion lëvizjet e mëdha të kapitaleve të “peshqve të mëdhenj” të trafikut dhe lidhjet e tyre me kupolën në Tiranë.
Dhe nuk u kuptua përse u kundërshtua ekstradimi i një personi që e kërkon drejtësia italiane.
Argumenti që Seiti është i hetuar nga Krimet e Rënda, duket se nuk është shumë i fortë, pasi nëse do të kishim një kërkesë të tillë për Saimir Tahirin për shembull, i cili është gjithashtu nën hetim nga Krimet e Rënda, opozita jo vetëm që do ta mbështeste por do ta bënte “flamur politik” për protestën e pritshme.
Por përse kundërshtohet ekstradimi i njeriut besnik të Moisi Habilajt? Ai maksimumi mund të flasë çfarë di dhe që mund të shërbejnë edhe për hetimin shqiptar.
Duket se dosjet e mëdha po vijnë nga jashtë, siç po e tregon edhe avancimi i rastit “CEZ”, ku prokuroria çeke ka bërë gati fashikujt për t’i sjellë në Tiranë jo thjesht bruto, por të hetuara dhe bërë gati nga investigatorët e Pragës. /tesheshi.com/
