Viktima më e re në mesin e të paktën 21 personave që vdiqën në një tavernë të Afrikës së Jugut gjatë fundjavës ishte 13 vjeç, tha ministri i policisë Bheki Cele.
Shkaku i vdekjes nuk dihet ende, ndërsa autoritetet po hetojnë.
Viktimat u gjetën të shpërndara në dysheme dhe tavolina në Tavernën Enyobeni.
Trupat e pajetë janë dërguar në morg, ku do të kryhet autopsia.
Cele, i cili vizitoi vendin e ngjarjes, tha se të vdekurit ishin midis moshës 13 dhe 17 vjeç, por një listë e detajuar e viktimave nuk është publikuar ende.
Raportohet se këta të rinj kanë shkuar në tavernë për të festuar përfundimin e provimeve shkollore.
Presidenti i Afrikës së Jugut Cyril Ramaphosa shprehu “ngushëllimet më të thella” për familjet e viktimave.
Oscar Mabuyane, kryeministri i provincës East Cape ku ndodhi tragjedia, nuk deklaroi shkaqet e mundshme të vdekjes, por dënoi “konsumimin e pakufizuar të alkoolit në shoqëri”. Duke folur në vendngjarje, siç shkruan BBC, ai tha: “Nuk mund të bësh tregti në mes të shoqërisë dhe të mendosh se të rinjtë nuk do të eksperimentojnë”.
Ngjarja ka ndodhur në orët e para të mëngjesit të së dielës.
Një zyrtar i sigurisë provinciale i tha agjencisë së lajmeve AFP se ishte e përjashtuar që rrëmuja të ishte shkaku i vdekjes sepse “nuk kishte plagë të dukshme”.
“Forenzika (hetuesit) do të marrin mostra dhe do të testojnë për çdo helmim të çdo lloji,” tha Unathi Binqose. /tesheshi.com/
