Nga Blendi Gashi
Ndërsa çdo ditë e më shumë po flitet për shkuarjen në zgjedhje të jashtëzakonshme ku edhe po organizohen sondazhe të shumta se cila parti eventualisht do triumfonte, në një frymë të tillë, pra të zgjedhjeve, ka folur së fundmi edhe ambasadori britanik Ruairi O’Connell.
Në një organizim të mbajtur dje nga Instituti Demokratik i Kosovës në mbështetje të ambasadës britanike, O ‘Connell, konkretisht drejtoi një mesazh për personat që ende janë të pavendosur se cilës parti duhet t’ia besojnë votën e tyre.
Ai bëri një deklaratë tejet të fortë duke i cilësuar disa parti të lidhura me kriminelët.
“Si votoj unë në Britani? Para zgjedhjeve unë mendoj: Filozofia e cilës parti përshtatet me filozofinë time? A i besoj unë premtimeve të tyre apo mendoj që ato janë qesharake? Kur ishin në pozitë, a bënë atë që premtuan që do të bënin? A mendoj që janë të gatshëm të kryejnë punën që kërkohet nga ta? Por më e rëndësishmja, unë kurrë nuk do të votoja për një parti e cila ka përkrahur kriminelët ose ka përfshirë kriminelët në listat e tyre”, tha O’Connell, në prani të presidentit Thaçi.
Siç mund të shihet, mesazhi që përçon ai për votuesit kosovarë është të kenë kujdes se për kë votojnë, konkretisht mos ta votojnë një parti që është e lidhur me krimin.
“Përplasja O’Connell – Mustafa”
Por pyetja kryesore shtrohet se cilën apo cilat parti goditi ambasadori britanik përmes mesazhit të tij?
Ndonëse ambasadori britanik nuk bëri me gisht ndaj asnjë partie, por duke qenë në dijeni se edhe më parë ka folur për “kriminelët”, konretisht deklarimi i tij pas dorëheqjes së bërë nga deputeti Rrustem Mustafa (Remi), pas ngritjes së aktakuzave për krime lufte, mund të konkludohet se është PDK-ja një prej partive që e ka menduar O’ Conell.
“As Kuvendi, as zyra publike, e as liria nuk janë vendi i duhur për njerëzit e dënuar për krime të rënda. Vendi i duhur është burgu”, deklaroi O’Conell, pas largimit të Remit nga posti i deputetit.
Ndaj ambasadorit britanik reagoi më pas Remi, i cili tha se e respekton ambasadorin, por sipas tij nuk ka zgjedhur rastin e duhur për t’u distancuar nga krimi.
“E di,drejtësia i takon fushës së ëndrrave, vetëm forca mbisundon. Nuk është gabim çfarë ka shkruajtur Ambasadori, pa marr parasysh nëse ka pasur borxh për tu deklaruar ose jo?! Unë kam thirrur vetëm në respektim procedurash, duke mos dashur në vendin tim sundim autoritar… Unë kam shkuar në burg vullnetarisht dhe po thuaj se e kam vuajtur dënimin… Respekt ambasador nuk e ke zgjedh rastin e duhur për distancim nga krimi…”, reagoi ish-deputeti Mustafa.
Duke parë këtë përplasje nga distanca mes O’ Connell dhe Remit, kuptohet qartë se ambasadori britanik ka aluduar në PDK-në si parti që ka përkrahur siç thotë ai kriminelët.
Por, mbetet enigmë nëse deklarata e tij godet edhe ndonjë parti tjetër apo jo, kur dihet se jo pak shkruhet se pothuajse shumica e politikanëve janë të lidhur me krimin e korrupsionin.
Mbetet të shihet se sa do reflektojë në zgjedhjet e ardhshme deklarata e O’Connell dhe nëse mesazhi i tij do kuptohet nga kosovarët, që edhe ata të votojnë si ai, pra për atë “parti që u përshtatet filozofia e tyre”. /tesheshi.com/
