Një tjetër musliman në shtetin amerikan të New Mexico-s është vrarë dhe autoritetet thanë të shtunën se po punonin për të përcaktuar nëse vrasjet e katër burrave muslimanë gjatë nëntë muajve të fundit ishin të lidhura me njëra-tjetrën.
Shefi i policisë së Albuquerque, Harold Medina, u tha gazetarëve se “një i ri që është pjesë e komunitetit musliman u vra të premten”.
Ai vuri në dukje se vrasja mund të lidhet me tre muslimanë të tjerë që u vranë në “të shtëna në pritë” në nëntë muajt e fundit.
Zyrtarët përsëritën kërkesën e tyre që kushdo që ka informacion rreth vrasjeve të kontaktojë policinë.
Masat e sigurisë janë shtuar edhe në pjesë të caktuara të qytetit ku jeton komuniteti musliman.
Këshilli për Marrëdhëniet Amerikano-Islamike (CAIR), organizata më e madhe e kombit për të drejtat e muslimanëve, e rriti shpërblimin në 10,000 dollarë, nga 5,000 dollarë, për informacionin që çon në një ose disa të dyshuar për vrasjet. /tesheshi.com/
