Një aksident automobilistik i ndodhur sot në Beograd ka tronditur qetësinë e Presidentit të Serbisë Aleksander Vuçiç.
Eskorta e presidentit serb është goditur në një nga rrugët e Beogradit nga një makinë luksoze Bently, e cila i përkiste yllit të kombëtares serbe të futbollit dhe të Sevillas, Ivica Dragutinoviç që tashmë ka lënë futbollin.
Por ish-lojtari i kombëtares nuk ndodhej në makinën me targa spanjolle, e cila drejtohej nga tre persona, të gjithë me precedent kriminalë dhe që punojnë si roje në një diskotekë të Beogradit.
E përditshmja serbe “Blic” thekson se nuk ka asnjë informacion nëse ndodhej Vuçiç në automjet, por kjo po mbahet në sekret të plotë.
Policia ka arrestuar të tre personat, të cilëve iu është gjetur kokainë në gjakun e tyre.
Ministri i Brendshëm serb, Nebojsha Stefanoviç, deklaroi në një postim në twitter se deri tani nuk është gjetur se aksidenti ka qenë i qëllimshëm, por ai theksoi se gjithçka është në duart e prokurorisë së Beogradit.
Bën çudi fakti se si persona të rrezikshëm përdornin makinën e lojtarit të kombëtares serbe, ndërkohë që Vuçiç vitin e shkuar shpëtoi zyrtarisht nga dy tentative atentati; një në shtëpinë e pushimit në periferi të Beogradit dhe një në zyrat e qeverisë serbe.
Ndërkaq, vetë Dragotunoviç ka postuar në instagram një foto me Bentlyn e tij ku ju uron përkrahësve në gjuhën spanjolle dhe serbe “një ditë të mbarë”. /tesheshi.com/
