Ndihmës Sekretarja e Shtetit Karen Donfried do të jetë përfaqësuesja më e lartë e administratës së Bidenit që vjen deri më tani në Ballkanin Perëndimor.
Ndihmës Sekretarja e Shtetit nga Zyra për Çështje Evropiane dhe Euroaziatike, dr. Karen Donfried do të jetë në Ballkanin Perëndimor nga data 25 deri më 29 prill, duke u ndalur në Shqipëri, Bosnje, Kosovë, Mal të Zi, Maqedoninë e Veriut dhe Serbi.
Më 25 prill, ajo do të falënderojë Kosovën për strehimin e refugjatëve nga Afganistani dhe Ukraina, për nxitjen e punës në reformat për konsolidimin demokratik dhe integrimin në institucionet evropiane dhe euroatlantike dhe do të diskutojë perspektivat për avancimin e dialogut të mbështetur nga SHBA-ja me Serbinë, me qëllim final njohjen reciproke.
Ajo mbërrin në Serbi më 26 prill për të inkurajuar vendin të çojë përpara reformat për integrimin evropian, të përmirësojë stabilitetin dhe prosperitetin rajonal, të diskutojë mundësitë për diversifikimin e mëtejshëm të energjisë dhe të zgjerojë sigurinë dhe lidhjet ekonomike dypalëshe. Ajo do të ritheksojë nevojën që Serbia dhe Kosova të riangazhohen në dialogun e ndërmjetësuar nga Bashkimi Evropian.
Më 27 prill, në Bosnje, Donfried do të inkurajojë zyrtarët që të vazhdojnë pjesëmarrjen institucionale në të gjitha nivelet e qeverisjes për të përmirësuar funksionalitetin dhe zbatimin e reformave për prosperitet më të madh dhe statusin e kandidatit në BE. Ajo do t’i bëjë thirrje Bosnjës që të mbajë zgjedhjet e vjeshtës në kohë dhe të bëjë përparim në luftën kundër korrupsionit endemik.
Në Maqedoninë e Veriut, ajo do të takohet me krerët e qeverisë më 28 prill për të treguar mbështetjen e fortë të SHBA për negociatat e pranimit të Maqedonisë së Veriut në BE, si dhe do të shprehë falënderime për mbështetjen e vazhdueshme për Ukrainën. Ajo do t’i bëjë thirrje anëtarit më të ri të NATO-s që të vazhdojë të punojë ngushtë në një sërë çështjesh rajonale, të sigurisë dhe të mbrojtjes për të promovuar demokracinë dhe stabilitetin rajonal.
Më 28 prill, Ndihmës Sekretarja e Shtetit për Evropën dhe Euroazinë do të shënojë 100-vjetorin e marrëdhënieve diplomatike SHBA-Shqipëri dhe do të falënderojë Shqipërinë për partneritetin e saj në Këshillin e Sigurimit të Kombeve të Bashkuara dhe angazhimin e saj ndaj sovranitetit dhe integritetit territorial të Ukrainës përballë agresionit rus. Ajo do të theksojë gjithashtu mbështetjen e fortë të SHBA për anëtarësimin e Shqipërisë në BE dhe integrimin ekonomik rajonal, si dhe nevojën për zbatimin e plotë të reformës në drejtësi dhe luftën kundër korrupsionit.
Donfried do të udhëtojë në Mal të Zi më 29 prill për të theksuar mbështetjen e SHBA dhe nevojën për të përshpejtuar rrugën euro-atlantike të Malit të Zi dhe pranimin në BE, për të forcuar anëtarësimin në NATO dhe për të mbështetur vlerat e përbashkëta, duke përfshirë luftën kundër korrupsionit. Ajo do të falënderojë gjithashtu Malin e Zi për bashkimin me sanksionet e BE-së kundër Rusisë, për ofrimin e ndihmës humanitare dhe të sigurisë dhe për mbylljen e hapësirës së tij ajrore ndaj avionëve rusë. /tesheshi.com/
