Ilir Meta ka qenë njeriu që ka bindur Ramush Haradinajn që të tërhiqet për Demarkacionin dhe ka ndërmarrë një mision diplomatic për ta zgjidhur këtë çështje me Podgoricën.
Burime parlamentare bënë të ditur se kreu i shtetit shqiptar ka ndërmarrë një mision ndërmjetësimi që rezultoi në fund i suksesshëm.
Ndërhyrja e Metës në lojë ka ardhur pas një kërkese nga vetë politikanët e Kosovës.
Mësohet se ka qenë Fatmir Limaj, politikani i mazhorancës qeverisëse, që natën e “tmerrshme” kur u dërgua në Kuvendin e Kosovës ligji për zhbërjen e Speciales, ka folur me Presientin e Republikës së Shqipërisë.
Limaj, i cili ka kundërshtuar ashpër draftin për anulimin e Speciales, i ka thënë Metës se në sallën e parlamentit të Kosovës kanë ardhur marinsat amerikanë, gati për të ndërhyrë.
Limaj ka propozuar që, meqë kreu i shtetit shqiptar ka marrëdhënie të afërta me Ramush Haradinajn, ai të ndërhynte për të zgjidhur ngërçin e krijuar si me Specialen, ashtu edhe me Demarkacionin.
Këtu ka nisur punën Meta, i cili mësohet se ka kryer konsultime me të gjithë faktorin politik të Kosovës.
Më 6 shkurt, kur kryeministri i Malit të Zi, Dushko Markoviç anuloi vizitën në Kosovë, “mjergulla” ishte thjesht një pretekst zyrtar. Realisht ishte vetëm një tërheqje taktike.
Pikërisht më 6 shkurt, Ilir Meta me Fatmir Limajn udhëtuan drejt Podgoricës ku u pritën në një drekë nga presidenti Filip Vujanoviç dhe kryeministri Dushko Markoviç.
Në atë drekë është “gatuar” teksti i kompromisit që u firmos para pak ditësh në Prishtinë.
Për këto negociata ka pasur dijeni edhe Edi Rama, i cili nga ana e tij në disa intervista i bëri presion Haradinajt që të firmoste Demarkacionin.
Madje këtë deklaratë Rama e dha edhe në Prishtinë në një intervistë për Baton Haxhiun.
Siç mësohet, për këtë mision, Presidentit Meta i kanë mbërritur edhe sinjale pozitive nga partnerët, të cilët kanë vlerësuar mënyrën diskrete dhe pa bujë të negocimit. /tesheshi.com/
