Misioni i Bashkimit Evropian për Sundimin e Ligjit në Kosovë (EULEX) njoftoi se është duke përforcuar Njësinë e Specializuar të Policisë (SPU) përmes dislokimit të përkohshëm të pjesëtarëve të Forcës Evropiane të Xhandarmërisë (EUROGENDFOR).
Bëhet fjalë për anëtarë të Xhandarmërisë Kombëtare Franceze, Karabinierisë Italiane, Shërbimit të Sigurisë Publike të Lituanisë dhe Gardës Kombëtare Republikane Portugeze.
Këto forca do të punojnë së bashku me pjesëtarët e Njësisë së Specializuar të Policisë së EULEX-it me qëllim të përmirësimit të stabilitetit dhe sigurisë në Kosovë për të gjitha komunitetet, transmeton Anadolu.
Vendosja parazgjedhore
“Këto forca pritet të arrijnë në Kosovë për të forcuar kapacitetet e Misionit në terren dhe për të ofruar mbështetje për Policinë e Kosovës. Si instanca e dytë në sistemin e reagimit të sigurisë me tre shtresa, ata, nëse është e nevojshme, do të kryejnë patrullime të dukshme dhe do të kontribuojnë në vetëdijen e situatës së sigurisë,” tha EULEX.
Dislokimi i kësaj njësie rezervë po bëhet në prag të zgjedhjeve parlamentare që do të mbahen në Kosovë më 9 shkurt. /tesheshi.com/
