Ndaj Spanjës ka qenë thjesht e pamundur! 0-2!
Asnjë ekip nuk i ka bërë Shqipërisë atë që i bëri Spanja në 90 minuta. Nuk e la të merrte frymë, nuk e la të organizohej, nuk e la as të reagonte. I bëri çfarë deshi, e rrethoi, e goditi, e detyroi të gabonte!
Ia kemi dalë dikur në njëfarë mënyre ndaj Gjermanisë, kemi mundur kampionët e sapokurorëzuar të Europës, Greqinë, kemi mundur kampionët e ardhshëm të Europës, Portugalinë, i kemi bërë të heshtin gjelat e Francës, por ndaj Spanjës është thjesht e pamundur.
Krejt të përsosur në përpunimin e topit, në manovrën e tyre… Të shpenguar, tejet të koordinuar…
E megjithatë, goli i tyre i parë ka ardhur nga një gabim i yni.
E këtu kemi një rastësi të frikshme. Pak ditë më parë Buffon gabonte rëndë në minutën e 55-të, e Vitolo shënonte për Spanjën ndaj Italisë. Në të njëjtën minutë është Berisha që largon gabueshëm një top, prej nga vjen dhe goli i Diego Costa-s.
Veçse Italia do të barazonte, edhe pse do ta godiste portën spanjolle për herë të parë në minutën e 75-të.
Ndryshe ngjet me Shqipërinë, që e ka të vështirë të kundërpërgjigjet, duke pësuar një tjetër gol të evitueshëm. Nolito e thellon rezultatin në minutën e 63-të.
Statistikat janë të frikshme: 71 për qind e mbajtjes së topit në këmbët e spanjollëve, e gjithçka tjetër flet për ta. De Gea ka qenë gati një spektator, mbrojtja spanjolle pak është ngacmuar, ndërsa mesfusha ka bërë gjithçka mirë, me sulmin që ka qenë efikas në momentin e duhur.
Ngushëllimi është vetëm ky: Shqipëria ka humbur ndaj një Spanje të papërballueshme! /tesheshi.com/
