Golashënuesin më të mirë të botërorëve, me 16 gola, një më shumë se braziliani Ronaldo, ish-lojtarin e përfaqësueses gjermane, nuk do ta shohim më të luajë në fushën e gjelbër. Miroslav Klose ka vendosur të tërhiqet nga aktiviteti si futbollist, edhe pse do të qëndrojë brenda futbollit.
Pasi kaloi pesë vite te Lacio në Itali, 38-vjeçari Klose nuk u aktivizua me asnjë skuadër që prej mbarimit të kontratës në nisje të korrikut të lënë pas. Prej tij ka ardhur më në fund vendimi për t’u tërhequr.
Klose ka luajtur gjatë karrierës së tij me Kaiserslauternin, Verder Bremenin, me Bajernin e Mynihut e me Lacion. Ai ka fituar Bundesligën, Kupën e Gjermanisë e të Italisë.
Ish-qendërsulmuesi është po ashtu shënuesi më i mirë i përfaqësueses gjermane, me 71 gola; në aktivizimet e tij me përfaqësuesen, 137 të tilla, ai lihet pas vetëm nga Matthaus, me 150 paraqitje.
Miroslav Klose ishte pjesë e Gjermanisë që fitoi Kupën e Botës në vitin 2014.
I tërhequr, Klose do t’i bashkohet stafit të trajnerit të përfaqësueses gjermane, Joachim Low, me synimin për të vijuar në të ardhmen karrierën si trajner. /tesheshi.com/
