Nga Ahmet Zani
Improvizmi i Dasmës Mirditore ka qenë mënyra që ka zgjedhur Bashkia Mirditë për të promovuar turizmin në këtë zonë. Aktiviteti në fjalë u organizua në një nga kullat më të vjetra të Mirditës, në zonën e Kthellës, ndërsa të pranishëm ishin me dhjetra turistë të ardhur nga vende të ndryshme të botës.
Në oborrin e kullës u ekspozuan produktet e zonësm që nga zejet e veshjeve, të çiftelibërjes, bimëve medicionale si dhe produktet gastronomike të zonës.
Në këtë veprimtari u zhvillua me kujdes i gjithë ritmi i hershëm i dasmës së krahinës, që nga marrja e nuses e gërshetuar me këngë dhe valle të traditës, e deri tek kulinaria vendase e shërbyer në natyrë.
Kryetari i Bashkisë Mirditë, Ndrec Dedaj tha se kjo zonë ja vlen për t’u vizituar, duke deklaruar se dikasteri që ai drejton po bën gjithçka për zhvillimin e turizmit. Dedaj ftoi turistët të vizitojnë zonën, ndërsa Drejtori i Pallatit të Kulturës në Rrëshen, Gjergj Marku renditi disa nga pikat pse duhet eksploruar kjo zonë, ndërsa shtoi se Mirdita po shndërrohet ndër destinacionet më të kërkuara turistike.
“Mirdita i ka përmbushur pritshmëritë e turistëv të huaj, ata vlerësojnë traditën dhe vendin me resurse të mëdha”, tha ai, duke deklaruar më tej se ajo çka i tërheq më shumë është natyra, gastronomia, si dhe mikpritja e banorëve të zonë. /tesheshi.com/
