Këshilli i Sigurimit i OKB-së ka votuar njëzëri për mbështetjen e marrëveshjes së armëpushimit në Siri, të ndërmjetësuar nga Rusia dhe Turqia. Rezoluta e miratuar u jep mbështetje dhe bisedimeve të paqes që pritet të zhvillohen në janar.
E miratuar në orët e vona të së shtunës, rezoluta bën thirrje për shpërndarje të shpejtë e të sigurtë të ndihmave humanitare anembanë Sirisë.
Armëpushimi i hyrë në fuqi një ditë më parë është respektuar përgjithësisht, ndërsa rezoluta është një shtysë më tepër për bisedimet që parashikohen të mbahen në Kazakistan midis qeverisë siriane dhe opozitës.
Vitaly Churkin, ambasadori i Rusisë në OKB, falënderoi Turqinë për kontributin e qenësishëm në arritjen e marrëveshjes së armëpushimit.
“Eshtë shumë e rëndësishme që Këshilli i Sigurimit i mbështeti këto përpjekje nga Rusia dhe Turqia,” deklaroi Churkin.
Anëtarët e Këshillit të Sigurimit e vunë theksin te rëndësia e zbatimit të menjëhershëm dhe të plotë të marrëveshjes së armëpushimit. /tesheshi.com/
