Qeveria miratoi më në fund projektligjin për Byronë Kombëtare të Hetimit, i cili është mbështetur me forcë nga SHBA dhe ka të bëjë me ngritjen e institucionit që do të ndjekë zyrtarët e korruptuar.
Byroja u miratua vetëm 4 ditë para vizitës së paralajmëruar të Sekretarit Amerikan të Shtetit John Kerry në Tiranë.
PD kërkoi të enjten e kaluar në Parlament që dokumenti i Byrosë Kombëtare të Hetimit të kalonte nga Qeveria më parë dhe projektligji të vijë në Kuvend si propozim i ekzekutivit.
Kur bënë këtë kërkesë, opozitarët sqaruan se drafti për të cilin flasin është ai i hartuar që në muajin tetor nga OPDAT dhe Ministria e Brendshme, me mbikëqyrjen amerikane, sipas PD.
Duke folur për herë të parë lidhur me debatin për kohen e miratimit të këtij projektligji, kryeministri Edi Rama la të kuptohet se gjithçka tashmë është në varësi të reformës në drejtësi dhe draftit final të saj.
“Komisioni i Reformës le të diskutojë dhe le të thotë fjalën e tij. Në momentin që Komisioni i Reformës thotë që ky dokument nuk e cënon Kushtetutën, të jeni të sigurtë fare se do të votohet pa as më të voglin ngurrim”, tha Rama.
Ndërkaq, LSI e përshëndeti miratimin e draftit kurse kryetari i PD-së Lulzim Basha tha se do ta miratojmë nëse merr OK nga Komisioni i Venecias.
/tesheshi.com/
