Pas ambasadës amerikane, është Euralius që ka përshëndetur miratimin e ligjit të vettingut të martën mbrëma nga parlamenti shqiptar. Me anë të një deklarate, ky mision thekson se ky ligj është shumë i rëndësishëm për zbatimin e ndryshimeve kushtetuese në kuadër të reformës në drejtësi.
“Euralius mirëpret miratimin e këtij legjislacioni shumë të rëndësishëm, në zbatim të ndryshimeve Kushetuese të miratuara më 22.07.2016. Me zbatimin e këtij ligji, do të fillojë një proces vleresimi për gjyqtarët dhe prokurotët, anëtarët e Gjykatës Kushtetuese dhe Gjykatës së Lartë, këshilltarët ligjorë pranë Gjykatës Kushtetuese dhe Gjykatës së Lartë si dhe ndihmësit ligjorë pranë gjykatave administrative dhe Prokurorisë së Përgjithshme”, thuhet në deklaratë.
Më tej, në deklaratë thuhet se “procesi i vlerësimit do të bazohet në kontrollin e pasurive, kontrolli i figurës (lidhja më krimin dhe të inkriminuarit), dhe profesionalizmi i gjyqtarëve dhe prokuroreve (aftësitë profesionale)”.
“Ky ligj hap rrugën drejt rritjes së besimit të qytetarëve në drejtësi”, përfundon deklarata. /tesheshi.com/
