Nga Bashkim Kastrati
Projektligji për Prishtinën, i cili ishte i shumëkërkuar dhe i shumëpërfolur, ka marrë dritën jeshile nga Qeveria e Kosovës. Pr/ligjin e kërkoi me ngulm Isa Mustafa, kur ishte kryetar i Prishtinës dhe akuzonte në atë kohë ish-kryeministrin Hashim Thaçi se po e bllokon qëllimisht, por kur ai erdhi në postin e kryeministrit e “harroi” këtë draft, nuk e kishte në prioritetet e tij. Ndërsa kryetari aktual Shpend Ahmeti që e kërkonte miratimin e këtij projektligji, e akuzonte Isa Mustafën, se nuk po e miratonte atë, sepse përmes tij, thoshte se Prishtina do të zhvillohej më shumë dhe këtë zhvillim, sipas Ahmetit, e pengonte Mustafa.
Por, ky projektligj është shumë i përfolur për faktin se ka rreth një dekadë që diskutohet për të, ndërsa është edhe obligim kushtetues miratimi i tij. Mosmiratimi i tij konsiderohej edhe shkelje e Kushtetutës së Kosovës. Për këtë ligj u fol shumë edhe vitin e kaluar kur Komuna e Prishtinës dhe Ministria e Administrimit dhe Pushtetit Lokal, akuzonin njëra-tjetrën se nuk kanë gatishmëri për bashkëpunim. Si duket rivaliteti politik tërë këto vite e ka bllokuar këtë projektligj. Konkretisht kanë bllokuar përmirësimin e jetës së qytetarëve të kryeqytet dhe të Komunës së Prishtinës në përgjithësi.
Por me ardhjen në postin e kryeministrit të Ramush Haradinajt, ky projektligj u nxor nga sirtari dhe u miratua nga Qeveria e Kosovës. Tashmë ai do të dërgohet në Kuvendin e Kosovës, ku pas shqyrtimit në komisionet përkatëse, do të dërgohet në njërën nga seancat për miratim.
Ky ligj do të rregullojë shumë fusha dhe do t’i mundësojë një zhvillim më të hovshëm Prishtinës.
Për faktin se aktualisht Prishtina përballet me probleme me të cilat nuk përballen komunat tjera, nxjerrja e ligjit të veçantë për kryeqytetin do të mundësojë ndryshimin e kësaj gjendje në të mirë të saj, qytetarëve, si dhe të gjithë atyre që jetojnë apo veprojnë në Prishtinë pa dallim se a bëhet fjalë për qytetarë të përhershëm apo jo.
Kjo për faktin se Komuna e Prishtinës në rolin e kryeqendrës mbulon një gamë të gjerë të shërbimeve, i shërben një numri të madh të banorëve në krahasim me komunat (qytetet) e tjera, ka një përqendrim më të madh të qytetarëve i cili shpesh reflektohet si mbingarkesë që dëmton cilësinë dhe efikasitetin e shërbimeve, ngarkon administratën në të gjitha segmentet e saj, e sforcon infrastrukturën urbane.
Më specifikisht, struktura dhe organizimi aktual i Komunës së Prishtinës nuk janë në gjendje t’i
bëjnë ballë ofrimit të shërbimeve publike marrë për bazë trendin e rritjes së numrit të popullsisë.
Kur jemi te financat lokale, Komuna e Prishtinës ballafaqohet me kufizime ligjore dhe
administrative të cilat e pengojnë në menaxhimin efikas të mbledhjes dhe shpenzimit të
mjeteve, e në këtë mënyrë dëmtojnë edhe kapacitetin qeverisës në arritje të objektiva
programore dhe strategjike.
Ligji për Prishtinën duhet të pëmbushë objektivat që kryesisht ndërlidhen me: statusin dhe organizimin e brendshëm, kompetencat, financimin, marrëdhëniet me institucionet shtetërore,
bashkëpunimin me komunat fqinje etj.
Ligji mundëson edhe krijimin e policisë për kryeqytetin
Probleme të shumta që hasen në përditshmëri e kanë bërë të nevojshme krijimin e policisë komunale, përkatësisht policisë së kryeqytetit. Kjo polici do t’i hiqte një barrë të madhe Policisë së Kosovës, si institucion i sigurisë shtetërore në nivel të përgjithshëm.
Ligji për Prishtinën do të mundësojë që Komuna të përfitojë grante shtesë nga qeveria prej 4 për qind, që i bie rreth 6 milionë euro më shumë, sesa ka marrë deri më tani. Deri më tani Komuna e Prishtinës e ka marrë grantin qeveritar sikur të gjitha komunat tjera, pavarësisht specifikave që ka si kryeqytet. Pra ka marrë grant në bazë të numrit të banorëve rezidentë, aty nuk janë llogaritur edhe banorët jorezidentë që janë me dhjetëra mijëra, e të cilët jetojnë dhe marrin shërbime në Komunën e Prishtinës.
Ky ligj gjithashtu do të definojë statusin dhe organizimin e veçantë të kryeqytetit në territorin administrativ të Prishtinës, do të ndikojë në dekoncentrim të ofrimit të shërbimeve publike bazuar në kërkesat të cilat pranohen nga qytetarët e përhershëm dhe jo të përhershëm të saj, institucionet shtetërore dhe institucionet ndërkombëtare që janë të vendosura aty si dhe persona juridik dhe fizikë që ushtrojnë veprimtari brenda territorit të komunës.
Ligji për Prishtinën do të ndikojë edhe në zhvillimin e qëndrueshëm të planifikimit hapësinor, zhvillimit ekonomik, lokale, shëndetësisë publike primare dhe sekondare.
Ndryshe, Kushtetuta e Republikës së Kosovës në nenin 13 ka përcaktuar se kryeqyteti i Republikës së Kosovës është Prishtina dhe se statuti dhe organizimi i tij do të rregullohet me ligj të veçantë. Po ashtu edhe Ligji për Vetëqeverisjen Lokale si ligj bazik për organizimin dhe funksionimin e vetëqeverisjes lokale ka paraparë që qyteti i Prishtinës si kryeqytet i Republikës se Kosovës do të qeveriset përmes një ligji të veçantë. Ligji për vetëqeverisjen lokale në provizionet e tij ligjore ka përcaktuar se ajo do të zbatohet për qytetin e Prishtinës deri sa të ketë legjislacion të veçantë për këtë qytet. /tesheshi.com/
