Takimi i G20-ës në Antalja të Turqisë u zhvillua nën masa të jashtëzakonshme sigurie. Mijëra policë e agjentë sigurimi, forca nga toka, nga ajri e nga deti mbikëqyrën për çdo çast hapësirën ku ishin mbledhur udhëheqësit e shteteve më të fuqishme të botës.
Një territor i lënë plotësisht në dispozicion të takimit dyditor, hotele të boshatisura nga pushuesit, pezullime të fluturimeve ajrore në aeroportin më të afërt, flisnin për një kontroll sigurie të nivelit më të lartë.
Pavarësisht këtyre masave, podiumin e pritjes së takimit të G20-ës e kanë vizituar miq të paftuar. Macet i gjen kudo në Turqi, ndërsa janë pjesë e jetës së atij vendi. Nuk është aspak çudi që në parqet e qyteteve, a në vende të tjera publike, të shohësh njerëz të çdo kategorie teksa ushqejnë macet, u blejnë atyre për të ngrënë apo u sjellin nga shtëpia.
Tre të tilla kanë guxuar dje të vizitojnë pikërisht vendin ku po zhvillohej takimi i G20-ës. Ato janë
shfaqur në podiumin e pritjes, ndërkohë që gazetarët e kameramanët po përgatiteshin për një transmetim të drejtpërdrejtë.
Dy prej tyre shihen të sodisin të çuditura, ndërsa një e tretë u merr erë luleve, për t’i ndjekur më pas dy të parat.
Pamjet filmike dhe fotografitë nga kjo skenë kanë nisur të bëjnë xhiron e botës, të shoqëruara diku me ironi e diku thjesht me një koment sqarues. /tesheshi.com/
