Miqësorja patriotike, Kosova shpartallon Shqipërinë. Panuçi: ishim zero!

Përfaqsuesja e Kosovës i ka dhënë leksion futbolli asaj të Shqipërisë duke e mundur pastër 3-0 në një miqësore të luajtur në Zvicër. Me dy gola të Zenelit dhe një të Zhegrovës, ardhur nga aksione model, skuadra kosovare tregoi një superioritet të qartë ndaj kuqezinjve të drejtuar nga Panuçi, të cilët ishin në ditën e tyre më të keqe. Këtë e pranoi dhe vetë trajneri italian pas ndeshjes, kur tha:   

“Ishim zero. Përgjegjësi jam unë. Sot, të gjitha kritikat janë të drejta. Mund të humbasësh, por jo kështu. Vuajtëm më shumë sot sesa kundër Italisë dhe Spanjës”, theksoi Panuçi, duke vijuar më pas me një përbetim: “Ishim shumë të shëmtuar për të menduar se kjo është Shqipëria ime e vërtetë. Jam treguar i butë, por nga sot do të vendos dorë të hekurt”.

Nga ana tjetër, i kënaqur u shfaq trajneri zviceran i Kosovës, Bernard Challandes: “Kemi luajtur mirë, me shumë pasime dhe kemi fituar të gjithë topat e parë dhe të dytë. Dua të falënderoj të gjithë lojtarët për paraqitjen e sotme, por edhe ato paraardhëse”. /tesheshi.com/