Skuadrat europiane po përgatiten për sezonin e ri, e në këtë kuadër po zhvillojnë mes tyre një sërë ndeshjesh miqësore.
Si pjesë e turneut pragsezonal Kupa Ndërkombëtare e Kampionëve, francezët e PSG-së janë takuar në nisje të kësaj dite me spanjollët e Realit të Madridit.
Kampionët e Francës kanë fituar 3-1 në takimin e luajtur në Ohajo të SHBA-ve. Formacionet ka qenë eksperimentale, por ai i PSG-së ka patur elementë më të mirë.
Francezët kanë kryesuar 3-0 në 40 minuta lojë, me një gol të shënuar nga Ikone, e dy të tjerët nga Meunier. Për madrilenët ka ngushtuar shifrat Marcelo në fundin e pjesës së parë me 11-metërsh.
Ndërsa në Kaliforni, Çelsi ka mposhtur 1-0 Liverpulin. Goli i vetëm i ndeshjes është realizuar nga Cahill me kokë në minutën e 10-të.
Fabregas ka dalë me karton të kuq në minutën e 70-të për një ndërhyrje të rëndë, por më pas u ka kërkuar falje kundërshtarëve në dhomat e zhveshjes.
Bajerni i Mynihut dhe Milani kanë barazuar 3-3 në Çikago. Dy gola janë shënuar nga Ribery, e një nga Alaba, për bavarezët, kurse kundërshtarët janë përgjigjur me golat e Niang-ut, Bertolacci-t dhe Kucka-s.
Më pas Milani ka fituar 5-3 me 11-metërsha. /tesheshi.com/
