Në kulmin e krizës në marrëdhëniet mes dy vendeve, kreu i diplomacisë së Berlinit, Sigmar Gabriel, ka bërë një gjest simbolik miqësie ndaj homologut të tij turk, Mevlut Çavushoglu, duke i shërbyer çaj; një gjest me një simbolike të thellë, hem diplomatike e hem njerëzore. Ishte Çavushoglu ai që vizitoi Gabriel në Gjermani, për të biseduar dhe njëherë mbi raportet dypalëshe.
Të dy ministrat thanë se do të “bëjnë gjithçka që është mundur për të përmirësuar lidhjet midis Berlinit dhe Ankarasë”, shkroi Reuters.
“Ne nuk presim që të biem dakord për gjë menjëherë. Ka dallime mendimi, por ne do të vazhdojmë diskutimin tonë haptazi dhe me respekt të ndërsjellë”, u citua Gabrieli nga AP.
Turqia dhe Gjermania ndajnë pikëpamje të ngjashme mbi vendet e Lindjes së Mesme të goditur nga konfliktet dhe bashkëpunojnë për çështje humanitare si migrimi, u citua Çavushoglu nga Reuters.
kreu i diplomacisë së Ankarasë, zëdhënës i vizionit erdoganist në krye të shtetit, kërkoi t’i jepet fund “diplomacisë me megafon” dhe një “fillim të ri” të bazuar në miqësinë dhe për një bashkëpunim midis “partnerëve të barabartë”, raportoi AFP.
Gabriel gjithashtu sugjeroi që vendet perëndimore duhet të ulin nivelin e ligjëratave të mbajtura Turqisë mbi vlerat demokratike, sepse mund të ishte kundërproduktive, tha ai.
Dy partnerë të NATO-s kanë shkëmbyer fjalë të ashpra gjatë vitit të kaluar, pas arrestimit të disa shtetasve gjermanë nga Turqia, pas përpjekjes së grushtit të shtetit të korrikut 2016.
Gabrieli i ka etiketuar gjermanët e arrestuar si “pengje” dhe tha se ata u burgosën për “arsye politike”.
Ankaraja, nga ana tjetër akuzon Berlinin për mbajtjen e pasuesve të klerikut me seli në SHBA, Fethullah Gylen, të cilin agjencitë për zbatimin e ligjit turk e mbajnë përgjegjës për përpjekje të grusht-shtetit. /tesheshi.com/
