Dje ishte një tjetër përvjetor i 21 janarit të 2011-s, ditës kur katër veta u vranë në një protestë të fuqishme të opozitës së asaj kohe.
Opinionistit Skënder Minxhozi i ka tërhequr vëmendjen reagimi i presidentit të Republikës, prej nga dhe është nisur për të shkruar një kolumnë me titull: “Dita kur Ilir Meta bënte mirë të heshtte”.
Minxhozi citon fjalët e Metës, “Ai 21 janar na kujton se politika ka përdorur dhunën për të arritur objektivat politike në mënyrë të pandershme,” për të nënvizuar në shkrim se, “Për të ka rëndësi të kapet fort, si aleati i tij më jetëgjatë në politikën shqiptare, Sali Berisha, pas qerres pa rrota të grushtit të shtetit, të cilën s’e besoi as edhe për sekondë as ai që e shpiku. Deklarimi i presidentit se 21 janar ishte fryt i protestuesve të manipuluar, e jo i shtetit me kobure në brez e të dalë mendsh, është në fund të fundit një përpjekje e tij për të shpëtuar alibinë politike të janarit 2011.”
“Pra, sipas presidentit,” thotë Minxhozi, “edhe nëntë vjet pas atij krimi shtetëror të pandëshkuar ende, teorema mbetet ajo më banalja, e prodhuar pak orë pas vrasjeve: opozita manipuloi protestuesit, ju mbushi xhepat me gurë dhe i yshti për dhunë ndaj godinës së qeverisë dhe i shtyu drejt dhunës.”
“Presidenti e kishte një rast për të heshtur sot më 21 janar, por vendosi ta shpërfillë,” mendon Minxhozi. “Paçka se Ilir Meta është ndoshta njeriu më interesuar në këtë vend që të mos hyjë në hollësitë e kësaj date, kur fati i tij politik u përkthye brenda orësh në një tragjedi që vazhdon të mbajë pezull një pjesë të kujtesës tonë kolektive.” /tesheshi.com/
