Ministrja e Mbrojtjes Olta Xhaçka e ka quajtur të pashpjegueshme një situatë të rëndë zjarresh këto ditë, duke aluduar për një dorë apo mendje keqdashëse me burim nga politika.
“Situatë e pazakontë. Gjatë muajit mars janë shënuar 243 vatra zjarri. Krahasuar me një vit më parë, ky numër ka qenë zero dhe pse me kushte atmosferike të ngjashme. Nuk mund të gjesh një vit tjetër me këtë frekuencë zjarri. Janë ndezur qëllimisht dhe në pjesën dërmuese pa asnjë arsye përfitimi.
Kemi të bëjmë me akte ta pastra vandalizmi për të mos i vënë një emër tjetër në mungesë të provave konkrete që do ti zbulojnë hetimet. Janë akte që për nga logjika dhe natyra u ngjajnë si dy pika uji atyre sulmeve me kallëpe tritoli të shtyllave të tensionit të lartë, që ndoshta si për rastësi kanë ndodhur po këtë periudhë”, tha gruaja në krye të Mbrojtjes shqiptare.
Ajo apeloi politikën, duke hamëndësuar që prej aty buron kjo situatë, që mos dëmtojë vendin për interesa të saj.
“Nuk ka e nuk duhet të ketë asnjë forcë politike, pavarësisht problemeve që ajo ka, që të mbështesë duke justifikuar, apo të nxisë përmes gjuhës së konfliktit e dhunës akte, që e theksoj, nuk dëmtojnë qeverinë, por rrezikojnë të kthehen në një kërcënim real për pronën dhe jetën e qytetarëve”, shtoi znj.Xhaçka. /tesheshi.com/
