Ministrja e Mbrojtjes Olta Xhaçka promovoi nisjen e një fushate, ku të rinjve do u ofrohen orë të lira mësimi në shkollat e mesme të vendit, me qëllim njohjen e tyre me mundësitë që Forcat e Armatosura ofrojnë për t’u punësuar, studiuar dhe shërbyer vendit.
Ajo ishte në shkollën “Perikli Ikonomi” në Fier, aty ku deklaroi se “në FA ka profesione nga më të ndryshmet. Nuk ka vetëm ushtarë, por ka edhe profesionistë. Në FA, ka nga të gjithë profesionet, gjë që ndoshta nuk duket, por që ne duam t’jua tregojmë, që ta konsideroni si një mundësi më shumë kur përzgjidhni karrierën tuaj.
Në FA, futesh jo vetëm për të bërë ushtarin, por futesh për të marrë një profesion, për të bërë një karrierë të mirëfilltë brenda FA-ve, edhe si jurist, edhe si ekonomist, edhe si pilot, edhe si mjek profesionit, edhe si infermier dhe çdo profesion tjetër që mund t’ju shkojë ndërmend.
Edhe për ata që duan një formim profesional edhe nuk duan të vazhdojnë arsimin e lartë ka vend në FA, mund të bëhesh një xhenier shumë i mirë, mund të bëhesh një teknik shumë i mirë, mund të gjesh një profesion që të shërben që të gjesh një të ardhme të sigurt për veten dhe për familjen tënde”.
Kjo fushatë e “orëve të lira” do të vijojë çdo ditë të premte, deri në fund të vitit, me gjimnazistë të të gjithë qarqeve në vend. /tesheshi.com/
