Ministrja e Arsimit Besa Shahini ishte në Fier, në gjimnazin “Janaq Kilica”, nga ku deklaroi se do zbardhet e gjitha ajo çfarë ndodhi me helmimin e dhjetra nxënësve nga një “peper spary” lëshuar në ambientet e shkollës, për të dytën herë në pak ditë.
“Kjo ka lidhje me një pajisje te përdorur nga nxënësit, edhe herën e parë edhe tani. Herën e parë e pamë si pakujdesi nga nxënësit që kanë dashur të bëjnë një sherr në shkollë. Por kjo tani është e patolerueshme. Do marrim masat e nevojshme. Policia dhe prokuroria kanë parë rastin, do gjejnë ata që e bënë , do shohim kamerat dhe çdo gjë tjetër.
Do marrim masa që mos të përsëritet më. Është e papranueshme. Shkolla do të marrë masa ndaj nxënësve, për më tepër do flasë policia. Do kemi më shumë oficerë policie dhe më shumë kamera në shkollë”, tha Shahini.
Më pas ajo shkroi në FB:
“Sapo dola nga vizita me nxënësit ne Fier, të cilët sot ishin ekspozuar ndaj një substance sipas mjekëve e padëmshme, por që irriton kanalet e frymëmarrjes, të hedhur në shkollën e mesme ‘Janaq Kilica’, Fier.
Fatmirësisht, gjendja e tyre momentalisht është normale dhe drejt stabilizimit të plotë. Është hera e dytë që ndodh dhe na shqetëson ky fakt.
Drejtuesja e prokurorisë dhe ai i policisë më siguruan se së shpejti do të dalin me përfundimet e tyre. Ndërsa në shkollë do të merren masat disiplinore të nevojshme, do të shtohen oficerët e sigurisë dhe po komunikojmë me mësuesit që të jenë më vigjilentë në raste të tilla.
Drejtorja e shkollës ka gjithë mbështetjen tonë për vendosjen e disiplinës në shkollë.
Jemi në kontakt të vazhdueshëm me prindërit që të qetësohen fillimisht nga situata absurde, por edhe të komunikojnë njëkohësisht me fëmijët e tyre për t’i ndërgjegjësuar se akte të tilla janë totalisht të papranueshme”, shkroi ministrja Shahini. /tesheshi.com/
