Studentët protestues e kërkojnë mes turmës, ndërsa ministrja e Arsimit Lindita Nikolla ka qenë në një tjetër ambient studentor por pa studentë.
Ajo ishte atje ku theksohet një ndër kërkesat e protestës, përmisimi i kushteve në konvikte.
Nikolla inspektoi investimin që po kryhet në godinat e Qytetit Studenti Nr.2, pranë “21 Dhjetorit” në Tiranë, ku ajo theksoi se qeveria ka akorduar 18 milion euro investime për atë që kërkojnë studentët.
“E kënaqur nga sa pashë. Eshtë godina e tretë nga katër godinat këtu në qendrën studentore Nr.2, që do të akomodojë studentë të inxhinierisë. Dy godina kanë përfunduar, kjo është e treta, vijojnë punimet tek e katërta. Standarde që kurrë nuk i kemi parë në godina studentore, qoftë në apartamentet ku ata do të akomodohen, po ashtu edhe me gjithçka tjetër që ka të bëjë me standardet, pra duke pasur një kuzhine të përbashkët në çdo kat, duke mundësuar sallën e studimit, internet në çdo dhomë. Gjithçka që studentët të kenë kushtet optimale për të vënë prioritet atë që është në fakt qëllimi i tyre, rezultatet sa më të mira në universitet.
Në janar studentët do e provojnë vete se çfarë do te thotë të investosh me standarde dhe ta kesh prioritet jetesën e studenteve Hera e parë që investohet 18 milion euro dhe besoj do të kemi ndihmë për të pasur edhe më me shume projekte investuese”, deklaroi ministrja Nikolla.
Më parë, ajo ftoi studentët protestues për t’u ulur e biseduar për çdo kërkesë të tyre. /tesheshi.com/
