Ministrja e Arsimit Lindita Nikolla e ka mbrojtur këmbëngulësisht ligjin për Arsimin e Lartë, duke mos ia mveshur atij problemet që janë hasur kohët e fundit në drejtimin e UT.
“Ju them me bindje se asnjë universitet publik sot nuk është në kaos prej ligjit të ri të Arsimit të Lartë. Dëshira për t’i veshur sistemit disa problematika të Universitetit të Tiranës është krejt e pavend. Problemet që has sot janë të brendshme që do të zgjidhen shumë shpejt me përfshirjen e të gjithë aktorëve në jetën e atij universitet dhe marrjen e vendimeve të duhura në kohën e duhur”, tha znj.Nikolla në Kuvend, në një inteperlancë pikërisht për problemet e ngritura së fundi nga një pjesë e stafit pedagogjik.
“Zbatimi i ligjit të ri ka sjellë sfida për të gjithë aktorët duke përfshirë dhe vetë Ministrinë e Arsimit. Askush nuk mund të thotë që zbatimi i një reforme të rëndësishme dhe kaq tërësore nuk do të ishte sfiduese për të gjithë aktorët, sepse kërkon ndryshimin e mentalitetit të të gjithë autoriteteve drejtuese, dhe të vetë ministrit të Arsimit që ka më pak kompetenca kundrejt institucioneve të arsimit të lartë”, theksoi gruaja në krye të Arsimit shqiptar prej 5 vitesh. /tesheshi.com/
