Në një tjetër status në FB, ministrja e Kulturës, Mirela Kumbaro, edhe njëherë ka dashur t`u përcjellë një mesazh lezhianëve të irrituar nga rivendosja e një mbishkrimi në kalanë e Lezhës, kushtuar Sulejmanit të Madhërishëm:
Fjala e profesionistit! Profesor Gjerak Karaiskaj thote:
“Po bej nje sqarim si specialist i paanshem (partiak apo “nacionalist”) per pllaken e vendosur mbi porten e kalase se Lezhes qe eshte bere objekt i madh diskutimi. Theodor Ippen, historian dhe konsull i Austrise ne Shkoder, ne nje nga librat e tij e pershkruan pllaken e vendosur mbi porten e kalase, qe ne vitin 1900. Per mua si historian vlen ashtu si cdo pllake apo mbishkrim tjeter qe ndihmon ne datimin e sakte te historise se nje monumenti. Ajo qe me shqeteson ne kalane e Lezhes, jane ndertimet pa leje qe e kane demtuar barbarisht. Shtepite jane ndertuar me guret e kalase dhe ajo qe per mua eshte edhe me skandaloze eshte qe ne vend qe te mos ishin lejuar, ne vend qe te prishen, po behen perpjekje qe te cojne edhe kanalizimet e ujit etj. Me bejne shume pershtypje shume fejsbuksa nga Lezha qe shqetesohen aq shume nga nje pllake datimi dhe nuk thone asnje fjale per bashkeqytetaret e tyre qe e kane shkaterruar kalane ne menyre barbare !”
Profesor Gjerak Karaiskaj, një nga njohësit më të mirë të fortifikimeve dhe kalave në Shqipëri shpjegon me qetësinë e njeriut të ditur se ç’është një pllakë me mbishkrim dhe ç’rëndësi ka.
Duke ndarë me ju shpejgimin e profesorit nuk mund të mos shtoj se jemi me fat që Shqipëria është një muze i hapur monumentesh! Kjo është fantastike! Ne kemi detyre t’i mbrojme, jo t’i fshehim e as t’i kyçim! Historianet kanë detyre t’i lexojnë e t’i shpjegojnë.
Nuk na e kanë fajin monumentet e kulturës për pishmanet, pamundësitë, apo gabimet e shoqërisë në shekuj!
Heroi ynë kombëtar quhet edhe Gjergj Kastrioti edhe Skënderbe, dhe këtë nuk e fshehim!
Uroj që reagimi në rrugë, facebook, media, forume dhe në kafene po të doni, të ngrihet fort në mbrojtje të të gjitha dëshmive të historisë dhe të kulturës sonë, pa komplekse dhe pa iu fshehur vetvetes!
Uroj që ky reagim të ngrihet kundër ilegalitetit të ndërtimeve që për vite të tëra përdhunuan kalanë e Lezhës, të Krujës e me radhë, e të mos i kishim lejuar kur ndodhën!!
Uroj që ky reagim të ngrihet kundër vjedhjes e përdhosjes së kishës së Shën Kollit dy ditë më parë, bash në Lezhë, ku s’dëgjuam njeri të indinjohej!
Uroj që ky reagim të ngrihet kundër gjuhës së urrejtjes, së përçarjes e fyerjes.
Uroj sidomos që reagimi dhe gjithë mobilizimi i shoqërisë të ngrihet KUNDËR PADIJES – armiku ynë më i madh!
Dhe për këtë ka vetëm një rrugë: EDUKIM, EDUKIM, EDUKIM!
Me çdo çmim!
Kujtojmë që janë shtuar zërat e atyre që jo vetëm kundërshtojnë rivendosjen e mbishkrimit në kala, por kërkojnë dhe dorheqjen e ministres; ndërkohë që të njëjtën gjë duhet të kërkojnë dhe ndaj kryministrit Rama, ngase dhe ky i fundit ka mbështetur fuqishëm rikthimin e Sulejmanit në kala, si mbishkrim kuptohet. /tesheshi.com/
