Kohët e fundit, ministrja në detyrë e Drejtësisë, Dhurata Hoxha, ishte mjaft aktive duke hedhur akuza të shumta ndaj Komunës së Prishtinës e Vetëvendosjes.
Por siç duket, PDK-ja dhe Hoxha, këto akuza po i bëjnë vetëm për të mbuluar bëmat e tyre dhe për të fituar pikë në prag të zgjedhjeve lokale, pasi institucionet e ndryshme të shtetit janë të mbushura jo vetëm me militantë partiakë, por edhe me familjarë të afërt të zyrtarëve të PDK-së.
Portali Periskopi mëson se në një rast të tillë skandaloz është e përfshirë pikërisht ministrja Hoxha.
Në Universitetin e Mitrovicës “Isa Boletini”, babai i saj, Sabri Sadiku, është kryesues i Këshillit Drejtues, i cili u emëruar nga Ministria e Arsimit në këtë organ.
Ministrja Hoxha, në po të njëjtin Universitet ka të punësuar edhe xhaxhain, Ali Sadiku, i cili është prorektor për buxhet dhe financa.
Babai i Dhurata Hoxhës, kryesues i Këshillit Drejtues në këtë Universitet, në maj të 2016-ës, sa ishte ende zëvendëskryesues, kishte shkelur edhe Ligjin për Arsimin e Lartë dhe Statutin e Universitetit, pasi së bashku me dy anëtarë të tjerë të Këshillit Drejtues, janë kthyer edhe në staf akademik në po të njëjtin universitet.
Hoxha u bë ministre e qeverisë në korrik të 2016, dhe si duket kjo gjë i ka kryer punë edhe për avancimin e babait, i cili tashmë është kryesues i Këshillit Drejtues dhe jo zëvendës.
Përveç kësaj, Sabri Sadiku, është pensionist dhe merr edhe pensionin e pleqërisë nga buxheti i shtetit. /tesheshi.com/
