Ministrja e Jashtme e Suedisë, Margot Wallstrom, ka thënë se Kosova dhe Katalonja nuk mund të krahasohen, pasi janë raste të ndryshme.
Ajo ka thënë se në Kosovë ka pasur situatë lufte, çka nuk është në Spanjë.
“Ne insistojmë që duhet të ketë një dialog ndërmjet përfaqësuesve spanjollë dhe katalonjas. Unë nuk mendoj se Kosova dhe Katalonja duhet të krahasohen, pasi situatat janë të ndryshme. Nëse ju jeni në një situatë ku konflikti është i armatosur, ku ka mundësi për krime lufte, atëherë ju jeni në një situatë të veçantë”, tha Wallstrom.
Ministrja suedeze foli edhe për gjendjen në Ballkan, ku tha se në vendet e rajonit ka shumë sfida të sigurisë.
“Por, unë shoh shumë potencial te vendet e Ballkanit për tu bërë pjesë e familjes evropiane”, tha ministrja e jashtme e Suedisë.
Sipas saj, të gjitha problemet duhet të zgjidhen vetëm me dialog. /tesheshi.com/
