Margot Wallstrom, shefja e diplomacisë suedeze, i ka deklaruar BBC-së se referendumi i Britanisë për qëndrim ose largim nga unioni europian mund të çojë në shpërbërjen e vetë BE-së.
Ajo ka shprehur mendimin se efektet e këtij referendumi, që do të zhvillohet më 23 qershor, do të ndjehen thellë, e se do të jenë në çdo rast negative.
Një efekt domino, mendon Wallstrom, se do ta shoqërojë referendumin, me një sërë referendumesh të ngjashme në vende të tjera të BE-së, e me kërkesa nga vende anëtare për kushte preferenciale, ashtu siç kërkoi Britania më herët.
“Kjo mund të ketë efekt te shtetet e tjera anëtare të BE-së, që do të thonë, ‘Në rregull, nëse ata mund të largohen, mbase ne gjithashtu duhet të kemi referendume, e ndoshta ne gjithashtu do të largohemi’,” ka thënë ministrja e Jashtme e Suedisë për një program të transmetuesit britanik BBC.
Siç ka qenë e idesë se diçka e ngjashme do të ngjasë dhe me kërkesat për kushte e trajtim të veçantë. Sipas saj, vende anëtare të BE-së mund të ndjekin shembullin e Britanisë e të kërkojnë trajtim të veçantë. “Në rregull, ata negociuan, e kërkuan të kenë një trajtim të veçantë. Po pse nuk duhet ta kemi ne një trajtim të veçantë?”, ka arsyetuar ajo.
Zyrtarja e lartë suedeze shpreson që Mbretëria e Bashkuar të qëndrojë në BE, si një partnere e rëndësishme tregtare për Suedinë. /tesheshi.com/
